Punjab sorkar chuan nimin khan department, board leh corporation zawng zawngte chu an signboard-ah Punjabi tawng hmang veka thil ziak tawh turin a ti a. Hei hian semi-government institution-te a huam vek.
Dan hman tur tharah chuan state road-a mellung zawng zawngah pawh Punjabi tawng hman tel zel a ni dawn a. National highways bik leh sorkar laipui hnuaia department-ah erawh hman ve kher tur tih a ni lo thung.
He hriattirna hi Higher Education & Languages Minister Tript Rajinder Singh Bajwa chuan nimina International Mother Language Day-ah a puang a. Punjab Languages Department chuan Punjab State Language Act, 1967 hmangin thupek pawh a chhuah nghal bawk.
“Sorkar leh semi-government institution, board, corporation leh mellung zawng zawng chu Punjabi tawng, Gurmukhi Script-a ziah tel vek tur a ni a. Tawng dang hman ngei a ngaihnaah chauh tawng dang hman tur a ni a, chu pawh hawrawp tê zawka ziah tur a ni,” tiin thuchhuahah chuan tar lan a ni.
Higher Education & Languages Department Secretary Rahul Bhandari chuan ziakin state department, divisional commissioner, deputy commissioner, district sessions judge, Punjab Vidhan Sabha secretary, Punjab & Haryana High Court registrar, board leh corporation chairman leh semi-government organisation-a an hotu theuhte chu he kalphung thar hmang tura ngenna a thawn.
Minister Bajwa chuan mi mal enkawl sumdawnna, industry leh zirna inah pawh hman tura tih a ni tih a sawi a. Hemi atan bika hriattirna erawh Languages Department-in labour department-ah hriattirna chhuah turin a thawn tawh tih a sawi a, an tihchhuah thuai a rinawm thu a sawi.