Aizawl : Lawngtlai Bawrhsap Cheemala Siva Gopal Reddy kaihhruaina hnuaiah nimin khan Lawngtlai district a sawrkar pisa hrang hranga hotute an thukhawm a, Lok Sabha inthlan lo awm tura inbuatsaihna kalpui dan tur an sawiho.
Bawrhsap chuan Lawngtlai district-a Lok Sabha inthlan felfai leh tluang taka kalpui a nih theih nan sawrkar department hrang hranga thawktute nen thawhhona tha neih a pawimawh thu sawiin, chanvo rualkhai taka sem zai a nih theih nan thawktu hming la thehlut lo Department-te chu rang taka bawhzui turin a chah a. Election chhunga mawhphurna pekte chuan chhuanlam siama awl bik tum lo turin a chah a, hrisellohna nei, District Medical Board-in a pawmpui te chauh awl tir an nih tur thu a sawi.
He thutkhawmnaah hian Lawngtlai district-a MLA Election 2023 kalpui dan thlirletna hun neih niin harsatna hrang hrang awm te leh a chinfel dan tur te sawiho a ni a. Election Official-te duty-na hmun a tui, inthiarna leh kawlphetha tha tak a thlunzawm a nih theih nana hmalak dan tur sawi a ni bawk.