Aizawl : Social Welfare changtu Minister Lalrinpuii chuan sorkarin tunah hian ruang phurh inkaihhruaina dan a duang mek niin House a hrilh.
Assembly budget session neih mekah nimin khan Leader of Opposition Lalchhandama Ralte-in mitthi ruang phurh chungchanga a zawhna chhangin Lalrinpuii chuan, sorkarin tunah hian ruang phurh inkaihhruaina dan a duang mek a, ngaihtuahna tam tak sen ngai thil a nih avangin cabinet agenda-ah pawh chhawpchhuak tum mek a nih thu a sawi.
Ruang phurh hi hmalak dan tur leh inkaihhruai dan tur hi buaipui mek niin, department chuan budget proposal-ah Revise Eestimate atan Rs vbc 1 an dah thu leh, Budget Estimate atan 2024-2025-ah hian Rs vbc 5 an dah mek a, an theh luh mek thu a sawi.
Lalrinpuii chuan motor hmanna rate hi kilometer wise a siam tum a nih thu leh, ruahman chhinnaah chuan mitthi an thihna hmun atanga anmahni in thlen a huam thu a sawi a. Mahse, phai lam erawh chu ruahmanna siam mekah a huam lo niin Assembly House a hrilh.