Aizawl: Social Welfare Minister Lalrinpuii’n tar pension chu mi pakhat tan thla khatah Rs. 1,000-a tihpun tum a nih thu house a hrilh.
Nimin session-a zawhna leh chhanna huna house member-te zawhna chhangin Rinpuii chuan old age pension chu tihpun tum a ni a, budget-ah pawh dah nghal a nih thu a sawi a, “Budget-ah hian mi 25,213 tan mi pakhata thla khat zel atan Rs 30,25,56,000 dah turin proposal thehluh a ni,” a ti.
Ruang phurh chungchang zawhna chhang bawkin Rinpuii chuan sorkarin tunah hian ruang phurh inkaihhruaina dan a duang mek a, ngaihtuahna tam tak sen ngai thil a nih avangin cabinet meeting-ah agenda atan chhawpchhuah tum a nih thu a sawi a, budget proposal-ah Revised Estimate 2023-2024 atan Rs. vaibelchhe 1 leh Budget Estimate 2024-2025-ah Rs. vaibelchhe 5-a dilna thu thehluh mek a nih thu a sawi.
Zawh belhna chhangin social welfare minister chuan ruang phurhna lirthei hman man chu kilometre wise-a siam tur a nih thu te, mi an boralna hmun atanga anmahni in thleng huam tur a nih thu leh phai lam a boralte erawh a huam loh tur thu a sawi bawk a ni.