Chief Minister Lalduhoma’n hmunphiah lei chungah a lei tura inhuam, RR Associates an chet hleih theih loh avangin beisei an phak lo ta tih leh thlai thar lei tur zingah hmunphiah hring a tel loh thu house a hrilh.
Nimina Assembly Session-a zawhna leh chhanna hunah hmunphiah chungchang sawi niin House Leader Duhoma chuan hemi chungchanga sorkar hmalakna sawi chhuakin, thlai thar pali lei tura an intiam thu leh a rate tur pawh mipuiah an puan thu te, chung chu budget session zawh, tangka kumthar atanga tih tura an puan a nih thu a sawi.
Hetihlai hian sorkar hmasain vote lei nana a lo ruahman, sum ningnawi awm chu ‘thlai thar lei nan hmang hlauh ang’ tiin, thlai thar palite chu lei nghal an tum thu an puang leh ta tih sawiin, thlai dang pathum chu sorkar rate bituk aia sanga leitu an awm avangin buaipui a ngai lo a, hmunphiah pawh chutianga tih chu tum mah se an rate anga lei duh RR Associates an awm thu te, an lei mai tura an ngaih laiin an che hlei thei lo a, manpower an lo nei lo nen an beisei an pha ta lo a, chu chu an chetsual chhan ber chu a nih thu a sawi.
Chief minister chuan sorkarin hmunphiah rate a siam anga lei duha insawi company an chet hleih theih tak loah chuan sorkar hmasa lama an lo tih dan angin ‘mahni lo inbuaipui rawh u’ an tih thu sawiin, hmunphiah hralhna turah hian area wise-in tih a lo ngai tih an zirchhuah tak thu leh kum thar lamah chuan area wise-in fel takin buatsaih a ni dawn tih a sawi.
Sorkarin tax holiday a puan chungchang sawi chhunzawm bawkin, sorkar hmasain royalty a lo laksak thin ang chu ti ve loin tax holiday an puansak tih te, transit pass pawh free duh mah se pass tel loa Vairengte thlang lamah a thawn theih loh avangin loh theih loh avangin transit pass an la ta tih a sawi bawk a ni.