- Mahmuaka Chhakchhuak
Nizana ka lehkhabu chhiar pakhat hi ka han sawi teh ang: Pa pakhat, zu in ngai miah lo hi zan dar sarih velah hian Bar (Zu zawrhna hmun) ah zu a lo in a. Chutia a ni meuh zu in ta chu tiin an thenawmpa hian a zawtin a zu in chhan chu hriat ngei tumin heti hian an inzawt a; Thenawmpa eng ati nge nang meuhin hetia zu i in a, hetia i ruih tak mai le? a ti a, a ni chuan ‘Vawiin chhunah khan bawnghnute sawr ka tum a, a hnute bur ka sawr khat tep tawh tihah chuan bawngpui chuan a ke hnung vei lam hian a rawn pal baw palh a, tichuan a ke chu thingah phuar betin ka han sawr leh a. A khat leh tep tihah chuan a ke hnung ding lam chuan a rawn pal baw leh a. A ke hnung dinglam chu hruiin banah ka phuar leh a, ka han sawr leh a, a khat leh tep tihah chuan a meiin a rawn vai baw leh ta a, ka thinrim tawh hle mai a, a mei chu phuar leh tumin hrui ka han zawng a, ka hmuh tak mai lohah chuan ka kawnghrena phuar tumin ka kekawr atangin kawnghren chu ka han pawtchhuak a, chutia kawnghren ka pawhchhuah lai tak ka nupuiin min lo hmu a, a thinrim a, ka insawifiahna pawh chu a ngaithla duh ta reng reng lo a’ tiin an nupa boruak chhiat chhan chu a sawi a.
He thu hi tak tak a ni nge nilo tih erawh ka hre hauh lo nain tak tak pawh lo nisela a awm ang hle mai dawn hi tiin ka ngaihtuah zui a. A nupui ngaihdan tur hi han ngaihtuah ila, bawngpui ke hnunglam pahnih phuar hnua kekawr kawng dul hnuka bawng mei lo vawn reng takah chuan a ngaihtuahna pawh a danglam phah tih a chiang reng a, chutiang dinhmunah chuan a thinrim pawh chu a demawm hauh loh. Nimahsela ngun taka ngaihtuah chuan a lan ang ngawt chu alo ni si lo a, buai lohna turah an nu chu a buaiin thinrim lohna turah a thinrim ta zawk a ni si a. He thawnthu hian ngaihtuahna tam tak min neih tir phah a, keini tan ngei pawh hian alo pawimawh dawn mange tihte ngaihtuahnaah a awm bawk a.
Pawn lam landanin ngaihtuahna a hneh theih zia pawh kan hre hlawmin a rinawm a, a bik takin hmeichhe lam phei chuan an hre lehzual mai thei e. Hmeichhe hoin hmaicheina an lo hman tam zia leh hmel alo tihdanglam theihziate hi keini ngaihtuah phah bak a ni hial awm a sin. Keini hriat ve kha chu powder leh hnawihsen emaw chauh kha a ni mai a, tunah chuan Eye shadow, eye brows, concealed, contour, foundation, blusher leh lip stick chi hrang hrang pawh a lo tam ta hle mai. Heng zawng zawng hian an hmai, khap tiat lekah chu an han sawngbawl kual vel chu a ni a, hmelthat loh ngaihna a awm lo reng reng. Chutianga a landan chu kan buaipui tak chiam avang hian alawm kan nun ngei pawhin a landan ringawt chu kan buaipui chhunzawm ta zel a, nun tak nei reng thin pawhin ze pawnlang leh ze dik tak kan lo neih phah tain a lemin kan nung ta thup thup a nih tak ber hi. Zahthlak hian.
Chhim lam lalnu finna kha Solomona ngei pawhin a khan lo e an ti a. Tumkhat chu Solomona chuan pangpar hi a keng a, khuai a thlawh kual tir a, khuai chu a lem nge a tak a han tih chuan chhim lam lalnu chuan a lem tiin a sawi nghal chat thei a. Chutia a sawi theihna chhan pawh chik taka a thlirin khuai chuan pangpar zu chu dawt a tum miah lo tih a hriat vang a ni a, a fing hle a ni. Hetiang ang deuh hian tunlai hunah chuan thil reng reng hi a lem nge a tak tih hi fiah hmasak zet a ngai ta zel mai a, kan tawngkam leh nundan ngei pawh a tak leh a lem a awm tak zel avangin Thelma anga rilru tluang purh tan chuan awmdan thiam har tak tur a ni zo ta. Tawngkam thate lah hi kan han ngah hlawm ropui mai si a, a tak tak leh tak tak loh hi rei fe ngaihtuah hmasak zet loh chuan awih ngawt chi a ni ta hauh lo mai.
Zonun zemawi – Tlawmngaihna kan tih ngei pawh a tak takah chuan ropuiin chhuanawm tak nimahsela a phena thil awm a awm tak zel avangin chawimawi hleihtheih loh a nihna lai hi a lo awm leh thin si. Hmingthat duhin miin thil a ti a, hmingthat a duh chhan erawh a ropui vak leh si thin lo hi thil buaithlak tak a ni a. A hmingthat duhna chu eng pawlah emaw hruaitu nih a duh vangte alo nih leh daih si chuan kan tlawmngaihna ngei pawh hmaikawra hman alo awlsam phah zo ta hial a. A hmingtha leh a thangmawi apiangte chu mipui chuan duh thlan awm tak a nih laiin mipui lam lahin chutiang mi aia in ve zauh zauh theite an han thlan tlin zawk fo chinah phei chuan kan nun dan hi hriatthiam a har a, a mak mange tiin kan sawi kan sawi ta mai a nih zel thin hi. Zahawmna ngei pawh hi thawhchhuah tur emaw tih laiin awlsam taka neih tum kan lo la awm zel a, nihna leh chanvo avanga intihzahawm chawp kan tum ta zawk a, chulamah chuan khaw hmu lo lekin kan kal ta vak mai zel thin bawk si a!
Pathianthuin ‘Buh lem leh buh tak chu lo to za rawh se’ a tih angin thil engkimah hian a lem leh a tak hi a awm ta zelin a lem chu kan ngaina ta zawk hian a hriat tlat thin bawk si hi a zia lo thin ngawt mai. A zia lo tih ngawt hian a nihna tak a phawk chhuak zo kher lo ang a, a pawi takzet a ni tiin sawi ila a dik zawk hial awm e. Hmangaihna lem leh a tak a awm a, duhsakna pawh a lem leh a tak a awmin sakhuana ngei pawh a lem leh a tak ala awm zel emaw (a awm e tiin ka sawi phal rih lo) tih mai tur a nih hi. Heti reng hian nun hmang ila, eng nge kan thlen tak ang tih lam phei zawng ka ngaihtuah duh rih lo a, ka suangtuah ngam rih hek lo. Hetiang kan lo nih zawh tak avang hian alawm Altenford vaukamah ngei pawh khan Thelma pa khan Sir Phillip Bruce Errington-a kha a ngainat mai theih loh ni.