Aam Aadmi Party (AAP) leh Congress chuan Lok Sabha inthlan lo awm turah Delhi, Gujarat, Goa leh Chandigarh-a bial an inchan sem dan tur an tifel a, Haryana pawh an tifel thei tep nia sawi a ni.
NDTV-in Ningani chawhnua thu a dawn a tar lanah chuan nikuma Prime Minister Narendra Modi leh rorel lai, BJP sorkar paih thlak tuma intelkhawm, INDIA tangho hi an insingsa mek a ni.
Congress chuan a kimchang tak chu la sawiho hmabak a la awm niin an sawi a; mahse, a vawi thum nana BJP paih thlak tumin thapui erawh an thawh niin an insawi.
Ningani chawhma lamah khan AAP rorelna, Delhi- a bial inchan sem dan tur hi tihfel nia sawi a ni a. Chief Minister Arvind Kejriwal-a kaihhruai party hian bial li chuhin Congress-in bial thumah an chuh ve thung ang.
BJP rorelna state pathum leh Chandigarh-ah pawh tihfel thawkhat tawh nia sawi a ni bawk.
Prime Minister Modi-a chawr chhuahna, Gujarat-ah AAP hian bial hnih – Bharuch leh Bhavnagar-ah an chuh dawn a, heng bialte hi BJP MP Mansukhbhai Vasava leh Bharti Shiyal te vawn lai a ni a. AAP hian Chaitar Vaisava leh Umesh Bhai Makwana an dintir dawn a ni.
Inthlan hnuhnung berah khan Gujarat-ah hian AAP-in candidate an nei lo va, kum 2022-a Surat tual chhung inthlana an chet chhiat loh bakah assembly inthlanah bial nga lai an la zui bawk.
Congress erawh an che chhe hle a, kum 2017-a MLA an neih atangin 2022-ah assembly inthlanah 60 zet an chân a, kum 2009 hnu lamah Lok Sabha-ah bial an nei zo leh tawh lo va, a hma chuan bial 26 awmah 11 zet an chang thin.
BJP hian kum 2014 leh 2019 inthlanpuiah khan bial zawng zawng hi an la vek ve ve a ni.
Chandigarh-a Lok Sabha bial khat awm chu Congress-in an chuh dawn a, tunah BJP-in an vawn lai mek a ni a. Kirron Kher-a chu kum 2014 leh 2019 khan thlan tlin ve ve a ni a, a hma term thum erawh a zawnin Congress atangin Pawan Kumar Bansal chu thlan tlin a lo ni tawh thung.
A tirah chuan AAP pawhin candidate an dah dawn nia sawi a ni a; mahse, Congress kianin an pui dawn ta a ni.
Haryana-ah AAP hian bial khat an chuh rin a ni a, chutih rual chuan thil chiang lo a la awm.
Gujarat ang bawkin BJP-in inthlan hnuhnung berah khan an thunun hle a, bial 10 awmah chak vekin vote tla zinga 60% dawn an hmu nghe nghe a. Congress chuan 29% vel chauh an chang a ni.
Gujarat ang bawkin hemi tum hian AAP-in candidate an nei lo va, an state inthlan hnuhnung ber, kum 2019 pawh khan chuh lovin BJP-in bial 90 awmah 40 lain sorkar an siam a, Congress-in MLA 31 an nei ve phak bawk.
Goa lamah AAP hian Venzy Viegas chu South Goa-ah an dintir dawn tih an lo sawi tawh a; mahse, Benaulim MLA hi hnukdawk lehin Congress an dintir dawn zawk a, kum 2019-a lo tling tawh, Francisco Sardinha an dintir leh dawn nia sawi a ni.
BJP-in an awp lai, North Goa bialah khawi party zawkin nge candidate nei dawn tih erawh a la hriat loh.
Punjab-ah thil a chiang khat tawh bawk a, AAP chuan kar hmasa khan bial 13 an chuh vek dawn tih Kejriwal-a’n kar hmasa khan a lo puang tawh a, hemi tum hian Congress a sawt nasa viau bawk.
Lok Sabha inthlan hnuhnung berah khan Congress-in bial riat lain AAP-in bial khat chauh an la thung.
Hemi hnuah erawh boruak inthlakin AAP hian kum 2022 assembly inthlanah chiang takin hnehna an chang a, bial 117 awmah bial 92 zet an la thei.
Nilaini khan Congress chuan Uttar Pradesh-a bial 80 awmah bial 17 chuh turin Samajwadi Party nen an inrem a. Hei hi INDIA-a tangho zingah chuan state liana inremna siam hmasa ber an ni nghe nghe a. A hma ni chiahin AAP-Congress dang tur chuan Chandigarh mayor thlanah hnehna an chang bawk.
Samajwadi Party nena an inremna hi a hma lawk thlengin a buai hle a. Congress hruaitu, Priyanka Gandhi Vadra pawh inrawlhin SP boss Akhilesh Yadav chu amah ngeiin a kawm nghe nghe nia sawi a ni.
June thla eptu tangrualten an din, INDIA hian an member pawimawh, Bihar Chief Minister Nitish Kumar-a Janata Dal (United) chu an chân tawh a, Jayant Chaudhary-a Rashtra Lok Dal pawh chân thei dinhmunah an ding mek bawk.
Bengal-a rorel lai, Trinamool pawh nghingin bial insem danah Chief Minister Mamata Banerjee leh Congress hruaitu, Adhir Ranjan Chowdhury te an la inrem thei lo.
Chandigarh mayor chanvo an chang kha INDIA dinhmun a chawi kan tan rin a ni a. UP-a inremna awm ta pawh a tiphurtu ni ngei tura ngaih a ni a. AAP-Congress bial inchan sem dana inremna awm tan pawhin boruak tha a hrin rin a ni.