Aizawl: Congress party chuan sorkar laipuiah thuneihna an chang a nih chuan lo neitute tan Minimum Support Price (MSP) legal guarantee pek an tum thu an sawi.
Nimin khan Aizawl Press Club-ah All India Congress Committee (AICC) aiawha hmar chhak bialtu, National Spokesperson ni bawk Mathew Antony chuan thu thar thehdarhtute a kawm a. MSP chu loneitute tena hun rei tak ata tawh an ngiat niin, general election 2024 neih zawha office luah hunah INDIA sorkar ngaih pawimawh ber a nih tur thu a sawi.
Antony chuan kum 2014-a inthlanpui neih a nih dawn atang daih tawh khan BJP leh BJP prime ministerial candidate, tuna PM Narendra Modi ten loneitute tan MSP chu, tun hnai lawka BJP te ngeiin chawimawina Bharat Ratna an pek, Swaminathan rawtna angin an pek tur sawiin an tiam tih a sawi.
“Swaminathan rawtna ang chuan MSP chu total input cost bakah 50 per cent tur a ni a. Vanduaithlak takin BJP leh Modi te chuan an tihthin dan anga an thutiam te kalsanin, Supreme Court of India hnenah affidavit siamin ‘actual input cost plus 50 extra’ a MSP pek ngaihna a awm lo an ti a ni,” Antony chuan a ti.
Kum hnih kalta khan loenitute chuan Delhi daifemah lungawi lohna an lantir hnuah, prime minister-in MSP legal guarantee chu ngaihtuah intiam mah se, kum hnih a ral tawha engmah thleng a la awm lo tih sawiin Antony chuan, “Loneitute chuan Modi leh a thutiam te chu hrilhhriat nawn leh tumin, national capital an pan mek a ni. Mahse, national capital an luh remtihsak lovin danin an awm mek a ni,” tiin, Modi-a’n kum 2014 inthlanpui hma khan India mipuite thutiam hlentheih loh a tiam a ni. A thusawi te rilruah a la cham reng a, a thusawi te erawh prime minister a nih hnuah a theihnghilh vek thung tih a sawi bawk.