Health Minister Lalrinpuii’n state Health Care scheme hnuaiah damlo inenkawlna bill ba Rs. vaibelchhe 45 chuang a awm mek tih leh bill tangte hi tangka kum thar hmain pek chhuah vek tum a nih thu house a hrilh.
Nimina assembly budget session neihah member-te zawhna chhangin health minister chuan health care bill ba rulhna tura SEDP sum atanga Rs. vaibelchhe 40 dah hran chu sem chhuah a la ni lo tih te, tun dinhmunah hian health care bill la pek loh chu Rs. 45,59,61,743 a awm thu te, vaibelchhe 40 hi pek chhuah a nih chuan bill ba chu Rs. vaibelchhe 5 bawr vel chauh a awm tawh tur thu a sawi a, chungte chu financial year hmain pek a ni dawn tih a sawi.
Health care bill ba tam chungchangah sorkarna an chan hlim atanga hma an lak thu health minister chuan sawiin, finance changtu, Chief Minister Lalduhoma’n Rs. vaibelchhe 15 ruahman nghalin pek chhuah a nih tawh thu a sawi bawk.
Zawhna dang a chhannaah Health Minister Rinpuii chuan doctor leh thawktu indaih lohna a nasa a, hengte avang hian primary health centre 15-ah doctor an awm lo tih sawiin, tun dinhmunah health department hnuaiah doctor post ruak hnawh khah loh 101, nusre post ruak 143, health worker post ruak 412 bakah post dangah pawh hnaruak hnawh khah lo tam tak a awm tih a sawi a, MLA thenkhatin an bial chhung PHC-ah doctor dan tumna a awm leh awm loh an zawh chungchangah pawh doctor lak belh an nih hunah an dah tur thuin a chhang a ni.
Rinpuii chuan sorkar hmasain dan loin hmun 200 chungah health clinic a lo hawn thu leh heng hmunah hian SEDP hmangin health worker leh thawktu dangte chhawr a nih thu a sawi a, health department hnuaiah chuan SEDP hnuaia thawktu chhawr chu sorkarna an chan hma, November, 2023 khan tihtawp a lo ni tawh tih a sawi a, chuti chung chung chuan health clinic centre-te chu a tul dan anga chhunzawm zel an tum tho thu a sawi a ni.