India rama inthlanpui ber, Lok Sabha inthlanpui, kumina awm tur chu US-a hmunpui nei, mi thiamte chuan India chanchina inthlanna hautak ber tur a nih thu leh mipui rorelna rama inthlana hautak ber pawh a nih dawn thu an sawi.
Election Commission of India chu Lok Sabha member 543 thlan hun tur puang turin a inpuah chah mek a. “Kum 2016-a US president leh congress inthlan kha $ tld 6.5 a ni a, 2014 Lok Sabha inthlan kha $ tld 5 vel a ni bawk a, heng inthlan pahnih hian kumina inthlan tur hi a khum ngei hmel a, India inthlan hi khawvela sum hautak ber a ni ang,” tiin Carnegie Endowment for International Peace-a senior fellow leh South Asia Program-a an director ni bawk, Milan Vaishnav chuan a sawi.
“Inthlan lo awm turah hian BJP leh eptute an intluk tawk hmel hle a, mipuite rilru hmin thiam leh hruai thiam tur pawhin sum an chelek a ngaih hmel,” tiin a sawi.
Vaishnav hian inthlan buaipuitute chu sum chelek chungchangah tun hnaiah an tawng tam tawk lo niin a ngai a. Tun tum inthlan lo awm tur pawh hi inthlan hnuhnung ber leta tam sum sen a nih a rinawm tih a sawia ni.
Vaishnav hian mi tam takin political party tan sum an thawh thin tih a sawi a, heng sum thawhte hi a langtlang tawk lo hle tih a sawi a. Sum thawh a awm tih chauh hriat a ni a, a thawhtu mihring leh politician emaw, pawl emaw chu hriat harsa leh chhui theih a nih tawh thin loh thu a sawi.