February 21, Nilai zana English Premier League inkhel awmchhunah Liverpool chuan an mikhual Luton Town chu 4-1 in an hneh a, table-a an hmahruaina an tizau. Reds hian an manager chhuak tur Jurgen Klopp thlah nan EPL-ah champion ngei an tum a, point liin hma an hruai fal mek.
Hmahruaitu Lverpool hian Anfield-ah table hnuai lama awm, tlahniam thei dinhmuna ding mek Luton Town an mikhual a, an mualah goal an chhuah hmasa teh tlat. Hma taka goal an chhuah hi hun rei tak an sut thei lo zet a, chawlhlawk hnu lamah goal li an thun hmangin hnehna an chang let ta hlauh thung.
Anfield-a lenglut Luton hian beisei phak baka thain bul an tan a, inkhel tan atanga minute 12-na lekah Chiedozie Ogbene chuan hmahruaina goal thun. Table chung bera awm mek Liverpool lakah goal an thun hmasa hian a fuih phur viau a, hun rei tak chhung chu an goal an venghim zui hial nghe nghe a, si khat faia hmahruai chungin chawlhlawk an hmang.
Chawlhlawk hnu lamah Liverpool in an si phurh sut ngei tumin thapui an thawh a, goal pawh an thun ta thuai. Minute 56-naah defender Virgil van Dijk chuan Mac Allister corner pet chu tawih zetin a tauh goal a, an si phurh a sut. An si phurh an sut hnuin Reds an ser lar zui viau a, goal an thun belh leh thuai. Van Dijk goal thun atanga minute hnih hnu lekah Gody Gakpo chuan Mac Allister cross tha tak chu hnaite atangin a tauh goal a, minute 58-naah hma an hruai letna goal a thun.
Team lian lakah hnufual zawk an nih hnuin Luton Town tan chet a harsa zui viau a, goal an thun belh thei tawh lo. An mualah thatho taka inlan Reds tan hian Luis Diaz chuan minute 71-naah fuh zetin a pet goal a, an hmahruaina a tiau. Si hniha hma an hruai vangin Reds hi an chak dawn tih a chiang tawk viau tawh naa an la duhtawk mai lo. Hun tawp dawn hnaih minute 90-naah Luton Town tlarhnung chetsual an hrem a, Harvey Elliott chuan awlsam takin an goal lina a thun. Elliot goal thun hnu hian goal dang a luh belh thei tah lo va, Liverpool chuan an hmahruaina tizau turin an mualah point thum an hmu.
EPL hmahruaitu Liverpool hian khelh 26 atangin point 60 an hmu a, an mahni hnaih bertu Manchester City aiin point liin an sang zawk a. Champion lai City ai hian vawi khatin an khel tam zawk thung. Reds in an hmahruaina an sawh ngheh lai hian Luton Town erawh chuan 18-na an luah chhunzawm a, dinhmun hlauhawm zawkah an tlu lut ve thung.
Manager Jurgen Klopp chuan Liverpool hi season tawp hunah a chhuahsa dawn a. An pu chhuak tur thlah nan Reds hia trophy lian chawi ngei an tum. Inelna hrang hrangah pali-ah champion thei dinhmuna ding mek.