All-Star Games khelh a nih vanga chawlh a nih hnuin Inrinni zing atang khan NBA Regular season khelh chhunzawm a ni a, Bonton Celtics leh Dallas Maverics ten hnehna an chang chhunzawm. Inkhel dangah Golden State Warriors in hnehna an chang ve bawk.
Inrinni zing hian an khelh hnuhnung vawi rukah hnehna chang zawn a, Eastern Conference hmahruaitu Boston Celtics chuan an khingpui Chicago Bulls chu point 129-112 in an hneh a, vawi sarih chak zawn chiahin, an hmahruaina an sawh nghet.
Eastern Conference hmahruaitu Celtics hian an conference-ah pakuana luah mek chu Chicago Bulls lakah bul an tan tha viau a, quarter khatnaah point 12 zetin an chungnung nghal. Bulls hian bul tan chhe viau mah se an insiamtha nghal vat a, quarter hnihnaah point 11 zetin an chungnung zui ve leh ta mai a. Point khata hmahruai chungin Celtics chawlhlawk an hmang.
Chawlhlawk hnu lamah Celtics an khel tha chhunzawm a, an hawikir tawh lo. Quarter thumnaah point 16 zetin an chungnung a, quarter hnuhnung berah point liin an chungnung zui leh a. Point 17 in an khingpui Bulls an hneh. Bulls an hneh tum hian Celtics tan Derrick White chuan point 28 a thawkchhuak a, Jayson Tatum chuan point 25 a thawkchhuak ve bawk.
Inkhel dangah Celtics ang tho a vawi ruk chak zawn tawh Dallas Mavericks chuan vawi sarih chak zawn turin an khingpui Phoenix Suns chu point 123-113 in an hneh ve bawk. Western Conference-ah paruknaa awm mek Mavericks tan hian season kal meka khel tha tluang tak Luka Doncic chuan point 41 zet a thawkchhuak. Doncic hian NBA regular season kal mekah inkhel tinah point 34.2 a thawkchhuak zel ang a ni a. Amah aia record nei tha awm chhun chu game tina 35.3 thawkchhuak zel anga chhut Joel Embiid chiah a ni. Mavericks tan hian Kyrie Irving chuan point 29 a thawkchhuak ve bawk.
Khel tha tluan Celtics leh Mavericks ten hnehna an chan rual hian khel chhe tluang Golden State Warriors chuan hnehna an chang ve nawlh a. Warriors hian an khingpui Los Angeles Lakers chu point 128-110 in an hneh.
Inrinni zinga chak langsar zingah Denver Nuggets an tel. Nuggets hian an khingpui Washington Wizards chu point 130-110 in an hneh. Nuggets tan hian Nikola Jokic chuan point 21 a thawkchhuak a, ball sawhlet vawi 19 a dawn bakah assist vawi 15 zet a nei bawk a, triple-double a puitlin. Jokic hian NBA-a team awm zawng zawng team 30 lakah triple-double a puitlin ta vek a. NBA player zingah hetiang ti thei pathumna a ni a. Hetiang sulhnu ropui lo hnutchhiah tawhtu LeBron James leh Russell Westbrook te hnung a zui. Wizards laka an chakna hian khelh thum chhung tlawm zawn tawh Nuggets hnehna ni a herchhuahpui.
NBA inkhel a hmuhnawm chho viau a, team 30 te inelkualna boruak a nung thar hle.