Hindu pawl pakhatin West Bengal sahuana sakeibaknei hming an phuah pahnih chuan an sakhaw thil a khawih pawi pha nia an thlen avangin court-in an hming thlak turin a ti.
Sakeibaknei nu zawk hi Hindu pathian nu hming angin Sita tih a ni a, a pa zawk chu Akbar tia kovin ani hi kum zabi 16-na laia Mughal roreltu a ni.
Vishwa Hindu Parishad (VHP) chuan hetiang hming phuah hi an duh lo va, an pathian nu hming ang puttir a ni chu an sakhaw tihbawrhbanna niin an sawi.
Wildlife park pakhata sakeibaknei pahnih dan dun chu a chi loh niin an sawi bawk.
Zawhte lian chi pahnihte hi Siliguri district-a North Bengal Wild Animals Park-ah dah an ni.
Ningani khan court chuan thu remna tichhuakin ramsate chu ‘Hindu pathian, Muslim zawlnei, Kristian hming larsar, Nobel chawimawina dawng tawh leh zalenna sualtute hming ang phuah tur a ni lo’ a ti a ni.
“In duh chuan Bijli (tek) tih emaw, thil dang pawh in phuah thei a. Engati nge Akbar leh Sita tih in phuah kher?” tiin Justice Saugata Bhattacharya chuan a sawi a ni.
Court hian ranvulh pangngai ui ang chi pawh an hming phuah fimkhur turin a ti a. “A theih chen chena mi tana sawi awm lo tur zawm tur a ni,” tiin judge chuan a sawi.
VHP hi Prime Minister Narendra Modi-a BJP nena sawi zawm hlawh tak a ni a, India ram hmun hrang hrang atangin sakeibaknei hming phuah danah hian an lungawi loh thu an dawng tih an sawi.
“Sita-i hi Hindu pathian, Lord Ram-a khingpui niin khawvel puma Hindu-te zah leh biak a ni,” an ti a. “Hetiang thil hian sakhua a tibawrhbang a, Hindu-te rilru a tina a ni,” an ti.
VHP hian West Bengal-a roreltu, eptu ni mekte chu hetiang hming sakah hian an mawhpuh a, an hming hi an thlak lo a nih chuan nasa taka lungawi lohna lantir an tum tih an sawi.
“Sita leh Akbar hi hmun khatah an awm tur a ni lo,” tiin VHP thupuangtu, Vinod Bansal chuan a sawi bawk.