Congress chuan Lok Sabha inthlanpui lo awm turah an thawhpuite nen bial an inchan sem dan turah inremna an siampui belh zel a. Zirtawpni khan Maharashtra-a an thawhpuite nen bial 48 awma bial 39-ah an inching fel leh ta nia sawi a ni.
Rahul Gandhi-a’n Shiv Sena (UBT) boss Uddhav Thackeray leh Sharad Pawar-a kaihhruai zawk Nationalist Congress Party a kawm hnuah an inrem thei a. Party hian Uttar Pradesh-ah Akhilesh Yadav-a kaihhruai Samajwadi Party nen bial 80 awmah bial 17 chang turin an inrem a, Delhi-a bial sarih awmah Arvind Kejriwal-a Aam Aadmi Party nen inremin bial thumah candidate an nei dawn bawk.
Congress hian Mamata Banerjee-i kaihhruai Trinamool pawh thla hmasa chhunga an dawr hnuah an dawr thar leh mek a. An indawr hmasak kha chuan Bengal chief minister hian an state-a bial 42 awma bial hnih chauh pek ve a tum a ni.
Congress hian bial nga tala candidate neih ve an duh a; mahse, Trinamool thupuangtu chuan an duh lo niin a sawi a. “En chikna nena thlirin Congress hi bial thum pawh pek theihna a awm lo,” a ti.
Maharashtra-ah hian INDIA-a tangrualte hi bial riatah an la inrem hleithei lo thung a, heng zingah Mumbai bial hnih, South Central leh North West a tel a, Sena (UBT) leh Congress hian heng bialah hian din zawk an duh ve ve a ni.
Maharashtra-ah hian Vanchit Bahujan Aghadi boss Prakash Ambedkar chuan bial ngaa din ve a duh bawk nia sawi a ni a, hei hi an la tifel lo. Ambedkar-a party hi kum 2019 inthlanah khan bial 47-ah chuhin chakna an nei lo va, kum 2019 veka assembly inthlanah khan bial 236-ah chuh ve bawkin MLA pakhat pawh an nei zo lo thung.
Kum 2019-ah khan Sena hi la inthen lovin BJP nen an thawkho va, bial 23 an chuhah bial 18 lai an chang thei a, heng zingah hian Mumbai South Central leh North West pawh a tel a. Congress hian bial 25 an chuhah Chandrapur chiah an la thei a, Pawar-a NCP pawhin an inthen hma bawk niin bial 19 an chuhah bial li an la phak bawk.
Kum 2019 inthlan kha BJP-in an thunun hle a, bial 25 an chuhah 23 zetah an chak a ni.
Congress hian Uttar Pradesh dawta rorelna in hniam zawka MP ngah ber, Maharashtra-ah hian an thawhpuite nena bial inchan sem dan hi an ngaihtuah nasa hle a. Tun hnaiah chhuahsantu an tam avangin an tang a, tun hnai maiah khan Ashok Chavan pawhin a chhuahsan leh a ni.
Chief minister hlui hian BJP a zawm a, a hnu ni hnih lekah Rajya Sabha MP a ni nghal zui a. A hma lawkin an hruaitu hlun, Milind Deora chuan chhuahsanin Chief Minister Eknath Shinde-a kaihhruai Sena a zawmsan bawk.
Thackeray-a party hian tun hnai inthlanah Congress hian hnuhma ropui an neih theih loh em avangin an state khawpui, Mumbai-a bial awmte hi pek an zuam vak lo nia sawi a ni.
INDIA-a tel party hrang hrangte hi tun lai hian inthlan thlirin an buai hle hlawm a, Prime Minister Modi-a chu paih thlak ngei an tum hle.
June thlaa din, INDIA hian an mi pawimawh tak, Bihar Chief Minister Nitish Kumar-a Janata Dal (United) chu an chân tawh a. Jayant Chaudhary-a kaihhruai, Rashtra Lok Dal, Uttar Pradesh khawthlang lama Jat zinga lian tak pawh an chân tawh a. JDU leh RLD te pawhin BJP an zawm leh tawh bawk.