Sawrkar thar kan neihah hian mipuiin beiseina kan nei sang khawp mai. Ministry an siam tirh khan chief minister Pu Lalduhawma chuan minister ni turin integrity nei tha kan en ang a han tih phei kha chuan Mla zingah beiseiawm tak tak an tling fur a. A bik taka thlir mek kan ministry thar chu mizoram khai chhuak lawp turin kan beisei a ni. Dik tak chuan he ministry thar hi mipuiten beidawnna kar atanga an vote chhuah pawh ti ila a sual tam awm lo hial e. An campaign ah pawh mipui beidawng au aw chhanna an inti hial reng a ni. Kohhran, NGO leh mipui nawlpui hrim hrim pawh kan hlim a ni.
Mahse, hei assembly rorelna tak tak an han tan a. Mipui beiseina a hniam deuh rawih em aw a tih theih hial awm e. PHE minister in bill a put luh chu minister ve tho chuan tha a tih lem loh thu a rawn sawi chiam mai a. Chief minister ber lahin cabinet ah minister bill put luh sawiho lawk a awm loh thu a sawi bawk a. Kan ministry hi an lungrual vak lo nge kalphung tur thlir lawkna an nei lo aw tih rum rum tur a ni. Minister in house a bill an put luh tur hi cabinet in an sawiho lawk vek a. Tha an tih angin a changtu minister in house ah a rawn pharh thin kha a ni ngai a. Mahse, hetia mipuiin kan thlir thup laia thu nawi deuh deuh an han auchhuahpui ta mai hi mak tih loh rual ani lo. Chutih mek laiin health minister chuam health care bill bat pek anih tawh dan zawhna chu finiance minister chhan zawk atan a rawn dah hmiah mai a. Mahni deptt chhung hi chu chhang thei tura ngaih an ni a. Health care bill bat te phei hi chu inthlan hma atang tawha issue langsar zinga mi ani a. Lo inbuatsaih lawk ve awm tak a ni. Environment and climate change lam enkawltu minister lah chuan tunlaia issue lar tak hmunphiah chungchanga chhanna tur chu mizotawnga ziak awmsa pawh a chhiar dik hlei thei lo bawk. Hetiang hi tuna house a an perfomance mek a ni a. Hun lokal lehzel turah inngaihtuah an ngai hle.
Central sawrkarah khuan ministry an han siam hian minister te hian an department chanvo hi an hrechiang rang thei hle a. Inzirna hun pawh an la nei hman lo ang a tih turah hian an department chungchang hi chu hneh takin an rawn sawi thei nghal par par mai thin. Kan CM hian a ministry ah hian ruat fuh loh minister a kawl nual anih chuan a pawi thui hma in thlak ngam sela ram tan a tha ngei ang. Chuti anih loh pawhin a minister te hian tih tak taka an hna hi an zir phat phat a ngai a ni.