Aizawl: BJP Mizoram President Vanlalhmuaka chuan Mizoram chu tuihna awm lohna lam hlirah a tlan a, state dang chuan tui hna awmna lam an hria niin a sawi.
Upper Republic-a BJP Mizoram pisa, Mipui Run-a chhung inkhawmah nimin khan Vanlalhmuaka chuan thu sawiin, state dang ina an state tana politics an khelhna hmanrua te chu Mizoram mipuite hian an lo buaipui ve fo a fuh loh avangin, an tan tangkaina a awm lo tih a sawiin, “Mizoram chuan Mizoram politics buaipui ila, kan state-ah development tak tak kan thlentir theihna tur awm chhun chu BJP Central-a sorkar mek leh sorkar leh ngei tur hi a ni,” a ti.
Vanlalhmuaka chuan Mizorama sorkarna chelh tawh leh chelh mek, chief minister leh central-ah an kal tawh thin a, mahse, thil tak tak, Mizoram tan an la hawn awm a hriat loh thu a sawi a. “Mizoram chu tuihna awm lohna lam hlir ah kan tlan a, state dang chuan tuihna awmna lam an hria a, an state-ah pawh nasa takin development a thleng zut zut a, chutiang dinhmun chu keini pawh hian kan chan ve theih a ni,” a ti.
BJP Mizoram Core Group Member Lalrinliana Sailo pawhin thu sawiin, India ram inthlanpui lo awm leh turah BJP chuan MP 400 chuang nei turin hma lak mek a nih avangin, Mizoramah pawh BJP MP a neih chuan sorkar laipui malsawmna a dawng ve thei dawn tih hriat a tul tih a sawi bawk.