Nimin assembly session-ah MNF member Lalrintluanga Sailo resolution put luh Mizoram Subordinate Services Selection Board (MSSSB) thiah tak ennawn leh rawtna chu sawiho a ni hnuah hnawl a ni.
Lalrintluanga Sailo private resolution put hi ‘Mizoram Subordinate Services Selection Board (MSSSB) Mizo thalai hna zawng mek te tana rin tlak leh tangkai tak thiah tak hi sorkar in ennawn leh rawh se’ tih a ni.
Resolution neitu Rintluanga chuan, MSSSB chu thalai hna nei lote tana lang tlang leh rinawm tak hna thawk thin a nih thute, board chu sorkar hnathawk mek promotion, reguilazation, leh upgradation mamawh te’n a hun takah an chhawr tangkai thin a nih thute a sawi a, chumi avang chuan sorkar hnathawk promotion hun tawh leh services chungchangte chak taka kalpui a nih theih nan leh zirlai leh hnazawngte duhsam ngeiin MSSSB chu ding leh ngei se an duh a, sorkarin board a thiahna chu ennawn leh ngei tura an ngen thu a sawi.
Hemi chungchang sawihonaah hian House Leader, Chief minister Lalduhoma chuan sorkar hmasa thil lo tih tawh reng reng, a tha chhawm tlak a nih chuan iai hauh loin an chhawm zel dawn a, a chhe lai erawh an siam tha zel dawn tih a sawi a, MSSSB-a hnuaia hna dil zingah lak awm tak tak lak lohah an tang a, chairman in ruat danah pawh party-a adviser ni lai, vangvat kai chin te ruat an nih avangin rinhlelh loh theih loh a nih thu a sawi a, hengte avang hian he board hi thiah tura tih a ni a, hna lak chungchangah chuan MPSC kutah dahin an thuam chak dawn tih leh resolution put luh chu an thlawp theih loh thu a sawi.
Private resolution chungchangah hian member 24-in an ngaihdan an sawi a, a pawm lo zawnga sawi tam zawkin, Deputy speaker-in bukin, pawm loh duh an tam zawk avangin hnawl a ni ta a ni.