Aizawl: Aizawl khawpuia chengten ni tin hnianghnara tui hmu turin ni tin tui MLD 66.42 pump chhuah a ngaih laiin tun dinhmunah tui 28.77 MLD pump chhuah thin a ni.
Assembly session neih meka ZPM member VL Zaithanzama zawhna chhangin PHE minister Prof. Lalnilawma chuan tunah hian Aizawl khawpuiah mihring nuai 3 sing 7 sang 8 leh 500 (3,78,500) vel awm ang a ni tihte, tui hnianghnar taka dawng tur chuan Central Public Health and Environmental Engineering Organisation (CPHEEO) Guidelines-a Litre Per Capita Per Day 135 angin tui 66.42 MLD (Million Litre Per Day) mamawh a ni tih a sawi a, hetihlai hian tun dinhmunah erawh nitina tui pump chhuah thin chu 28.77 MLD a nih thu a sawi.
Zawhna leh chhanna hunah zawh belhna chhangin PHE minister chuan, Lunglei khawpuiin tui in tura harsatna a tawh thin ti ziaawm tura hmalak mek a nih thu sawiin, tui lakna greater lunglei water scheme tih changtlunna turin NESIDS hnuaiah proposal an theh lut tih a sawi a, hei hi sorkar laipuiin a pawm a sum a pe a, hma an la thei a nih chuan Lungleia tui harsatna nasa tak thleng thin chu a ziaawm chhoh ngei an beisei tih a sawi a. Zawhna dang a chhannaah thingtlang khuaa chennna in zawng zawng hnena tui connection pek vekna tura duan Jal Jeeven Mission (JJM) hnuaiah Mizoram pumah khua 728-ah tui connection pek an ni tawh tih a sawi bawk a ni.