India rama relkawng lei dawh san (railway pier bridge) sang ber tur, Manipur-a dawh mek chu dawh zawh hun tura ruahman, March 2022 hmain an dawh zo hman dawn niin Chairman Railway Board VK Yadav chuan a sawi.
Jiribam-Imphal railway project hi kum 111-a thui tur niin he lei pawh hi hemi atan hian a ni a. Lei dawhsan hi metre 555-a thui tur a ni.
Manipur hi tlangram a nih avangin relkawng siam hi a hautak hle a, km 111-a thui sialnaah hian lei 148 zet a awm dawn a, leiverh 47 zet a awm dawn bawk a. Sial zawh a nih hunah chuan rei lian chiin Manipur khawpui chu a tlawh thei tawh dawn a ni.
Chairman Railway Board VK Yadav chuan, “Lei dawh sang ber leh hun tiam hmain kan zo thei dawn,” tiin Noney district, Marangching-a thuthar lakhawmtute a kawmnaah a sawi a. “March, 2022-a zawh tura ruahman a ni a, hemi hma hian kan zawh theih a beiseiawm,” a ti.
Yadav hi Northeast Frontier Railways (NFR)-a General Manager Sanjive Roy leh Railways leh construction company-a mi pawimawhten an tawiawm a. Inrinni khan he relkawng sial meka leiverh thui tak pakhat, km 2.265-a thui pakhat chu Marangching khuaah hian an hawng nghal a, he leiverh hi Imphal atanga thlang lam km 65 vela hla a ni.
Noney district khawpui bul kawnga kawng dawh san hi India bakah khawvel huap pawha a sang ber pawl tur niin metre 141-a sang a ni dawn a. A dawhna atana sum ruahman pawh Rs Vbc 280 zet a ni.
Railway Board Chairman chuan rel tlan luhna tur leiverh tam zawk pawh zawh a ni tawh tih a sawi a, a sei ber tur chu la khawih mek a nih thu a sawi a. Tupul-Imphal railway tunnel hi kum 2008 atang tawha a verh hna thawh tawh a ni a, km 10.28-a thui tur niin India rama a sei ber pawl tling tur a ni.
“He leiverh hi a thui em avangin a siam a hautak hle a. Mahse, thui tak thawh tawh niin December 2021-ah chuan engkim peih hman tum a ni,” tiin a sawi.