India rama State hrang hrangte football hmanga an inelna lian ber Santosh Trophy khelh mekah Mizoram chu an khelh hmasak berah Maharashtra hneh lovin an tlawm nghal.
Arunachal Pradesh a khelh mek 77 Santosh Ttophy 2023-24 ah hian zirtawp zan Mizoram chuan Group B-a a match hmasa ber an khel a. Bul tan chhe lem lo mah se an khingpui Maharashtra lakah an vanduai a, 3-1 in an tlawm. Group B-ah hian Maharashtra chiahin point thum an hmu a, Mizoram tan quarter-final luh theihna kawng zau takin a la inhawng.
Golden Jubilee Stadium-ah Mizoram hian bul an tan chhe lova, Maharashtra lakah goal thun theihna hun tha nei mah se an chhawr tangkai thei lo. Mizoram in an hun tha neih an hloh laiin Maharashtra in an hun tha neih an chhawr tangkai ve thung a, Advait chuan minute 26-naah hmahruaina goal a thun. Goal an chhuah hnuin Mizoram an insiamtha a, hlauhawm taka nawr in Malsawmfela chuan uiawm takin a hun tha neih a hlah a, an si phurh a sut thei lo.
Bet zawka tang Maharashtra in fuh takin Mizoram an nawr let a, minute 77-naah vanneihthlak takin goal an thawkchhuak nawn leh. Ding lam sir atanga cross tha thawkhat tak chu Mizoram defender Lalhmunmawia chuan kawh zetin an lamah a pet goal a, an khingpuite hmahruaina a tihzausak.
Si hnih faia an hnufual hnuin Sangzuala Hmar in team a siksawi a, a tifuh. An inthlak kual hnuin Mizoram in an khingpuite an nawr na sawt a, minute 82-naah Mc Malsawmzuala chuan fuh takin a pet goal a, an si phurh a sut then. MC-a goal hnu hnu hian fuh zetin an nawr tlang nawn leh a, goal thun theihna hun tha tak nei bawk mah se uiawm zet maiin an hun tha an hloh nawn leh a, an si phurh an sut zo thei lo. Hun tawp dawnah Mizoram hian an nawr luat an tuar lova, goal an chhuah belh. Maharashtra hian counter attack atangin Mizoram an nawr tlang a, awlsam zetmin Dipak Prakash Patil chuan minute 90+6-naah an chakna nem nghet turin an goal thumna a thun.
Patil goal thun hnuin goal dang a luh belh thei tawh lova, Maharashtra lakah Mizoram chu an tlawm ta a ni. An khelh hmasa berah tlawm mah se Mizoram tan quarter-final luh theihna hun tha a la awm. An khelh hmasak berah hian tlawm bawk mah se an khel chhia hran lova, Maharashtra lakah an hnufual hran hek lo. Goal-ah an vanduai laiin an goal chhuah dan a vanduaithlak tel bawk a, an tan zan tha a ni lo. An goal chhuah dan erawh vanduaina ni bawk ma se siamthat theih erawh a ni tel tho thung.
Group B-a inkhel dangah Delhi leh Karnataka te chu 1-1 in an inhnehtawk a. Manipur leh Services te chu 1-1 in an inhnehtawk ve bawk. Mizoram hian vawiin hian point khat hmu tawh Karnataka an hmachhawn zui leh dawn a, quarter-final luh beisei zui turin point hmuh an mamawh ang.Mizoram hmachhawn tur zinga ngaihven hlawh ber chu Manipur a ni.