Spanish khawpui pakhat, Valencia-a apartment block lian taka kangmei chhuakah mi pali vel an thi a, mi 15 vel chin hriat lohvin an la awm mek bawk tih emergency services chuan an sawi.
Kangmei hi chhawng 14-a sang, Campanar venga block atanga chhuak niin a thenawm in a kang kai a ni.
Kang thelhtuten balcony atanga mi an chhanchhuak lai pawh hmuh theih a ni.
Mi thiamte chuan building-ah hian thil kang duh tak a awm avangin a inman kai chak niin an sawi.
Building-ah hian flt 138 awmin mi 450 an cheng niin El Pais chanchinbu chuan building manager sawi a tar lang.
Kang thelhtu paruk leh naupang telin mi 15-in hliam an tuar a, an nunna atana hlauhawm erawh a ni lo.
Valencia Mayor María José Catalá chuan thuneituten mi pakua atanga 15 inkar vel chin an la hre lo va, sorkar hotu dang pakhat erawh chuan mi 14 an chin an la hre lo niin a sawi ve thung.
Kang thelhtu 20 chuangin thelh tumin an bei a; mahse, thli a thawt nasat avangin an thelh mit harsa hle a. Zirtawpni tukah kha chuan meiin nasa taka a ur unin a ding tawh thung a. A bul hnaiah mi kal lo tura tih a ni bawk.
Tual chhung mite chuan kang thelhtute hian crane hmangin mi eng emaw zat an chhan chhuak a, an zingah hian chhawng sarihnaa nupa cheng pawh an tel niin an sawi.
In a kan chiam takah hian mi tak tak chuan kum 2008-09 inkara sak inah hian a sak nan eng hmanrua nge an hman tih zawhna a tam nghal hle.
College of Industrial Technical Engineers of Valencia Vice President Esther Puchades chuan a hmain he in hi uluk takin an endik tih Spanish news agency Efe hnenah a sawi.
A pawn berah hian polyurethane an hmang a, hei hi kangmei laka invenna atana hman ngai a ni meuh tawh lo va, aluminium-a tuam a ni bawk.
“Rang taka a kan nghal mai theih chhan pawh hi hetiang an hman vang hi a ni thei,” tiin Spanish chanchinbute hnenah a sawi.
Tun tum in kang hi a nasa hle a, Spain-ah chuan ram kang tih lovah chuan a nasa ber pawl a la tling a, thi pawh hi mi panga an tling tawh nia sawi a awm a, finfiahna erawh a la awm lo thung.
Spain hi in sak dan hmang leh kangmei laka himna tura dan zam khauh ber zinga mi a ni a. An in saknaah pawh sorkarin chhiat rupna thleng mai thei laka himna tur zawm tur dan tam tak a nei a, an kengkawh tha hle bawk.
Heti chunga chhiatna lian tak a thleng leh a chhunga awmte chhuak thei mang lova an awm hian zawhna a titam a, mi tam tak thin a tirim a, thuneitute hnenah pawh zawhna an ngah phah hle a ni.