Aizawl: Rajya Sabha MP K. Vanlalvena chuan nimin khan Mizoram larsap Dr. Hari Babu Kambhampati chu Raj Bhavan-ah kawmin, Kaladan Multi-modal Transit Transport Project (KMTTP) kawng sial mek chungchanga harsatna awmte sutkianpui turin a ngen.
An inkawmnaah hian K. Vanlalvena chuan, KMTTP sial mekah contractor chungchang te, security leh lei (bridge) chungchanga harsatna hrang hrangte a sawi pui a. Hna thawktuten harsatna an tawh te chu larsap a nihna angin sorkar laipuia External Ministry, Home Ministry leh Ministry of Road Transport and Highways (MoRTH) ah thlen turin a ngen.
Mizoram Larsap chuan a harsatna a hnena thlente chu Delhi a zin leh hmasak berah theihtawpa hmalak a tum thu a sawi.
An inkawmnaah hian KMTTP chu Act East Policy hnuaia insumdawnna kalkawng pawimawh tak a nih thu an sawi a, hmanlai insumdawnna kalkawng (Silk Road) thar thawh leh theih an beisei thu an sawi dun bawk.