Aizawl: Excise & Narcotics Department (END) Minister Lalnghinglova Hmar chuan Inrinni khan Kolasib-a END Assistant Commissioner pisa tlawhin thawktute nen an inkawm a. Minister hian thawktute chu transfer chungchangah lo inring lawk turin a chah.
Lalnghinglova Hmar chuan Mizoram Excise & Narcotics Manual angin transfer leh posting kalpui a ni dawn tih sawiin, thawktute chu lo inring lawk tura chahin, “Sorkar hna thawk tan awm duhna bik emaw, awm duh lohna bik emaw neih a rem lo. Mahni awmna apiangah thahnem ngai taka thawh a tul,” a ti.
END Minister chuan, sorkarin ruihhlo leh ruihhloin a tihbuaite chhanchhuahna lam a ngai pawimawh tih a sawi a. Thawktu indaih lohna tiziaawm tura sorkar hmalakna kalpui mek a nih thu te, thawktu leh hna thawhna hmanruaah a theih ang anga inthuam that tum a nih thu a sawi.
Zu leh ruihhlo hluar zel leh chumi avanga thi leh HIV vei pung zel tiziaawm turin a tha zawnga danglamna thlen a ngai tih sawiin, chumi kawnga ram siam that hna thawhnaah tang tlang turin thawktute chu a sawm bawk.
END Minister hian Kolasib District Office tan thilpek, Rs 20,000 a hlan nghal bawk.
He inkawm hona hun hi END Commissioner Z. Lalhmangaiha’n a kaihruai a ni.
He huna tar lan a nih danin, Assistant Commissioner of Excise & Narcotics, Kolasib District hnuaia station pahnih – Kolasib Station leh Vairengte Station atangin kumin February 22 thlengin Rs 5,78,313 chhiah hmuh a ni tawh a. Zu leh damdawi eng emaw zat an man bakah, NDPS Act hnuaiah thubuai pathum ziak lutin, mi pathum an man a; MLP Act hnuaiah case 516 ziak lutin, mi 516 an man leh tawh bawk.