Kum hmasa 2023 ah state sawrkar siamin kan inthlang a. Vawiin ni a kan sawrkar hi kan hmu a. Democracy inkaihhruainaah political party te chu a pawimawh ber an nih angin engkim mai tih theih deuhthaw hi political party te inkaihhruainaah a innghat a. Kan political party te kalphung hi mipuiin kan zui a. Anni hian ram kaldan tura an duan angin kan ram chu a kal a ni. Hetiang hi democracy kalphung tur pawh a ni a. An party kaihruaituah mipui pawh kan innghat a ni. An hruaitu in an kalpui firfiak deuh leh an kal vung deuh a. An kaihhruai nem deuh chuan thawm a dai deuh a ni.
Kumin kumthar chhoah political party te an insingsa chho a. Sawrkarna siam mektu Zpm chuan an party hruaitu thlanna an nei zo tawh a. An president pangngai Pu Lalliansawta chuan a kaihruai leh dawn a. Sawrkarna la chelh ve thei tura ngaih Congress party pawhin inthlanna nei zo tawhin preaident la ni ngai lo Pu Lalthanzara chuan president niin a kaihruai ve thung dawn a. Anni hi central lamah thui tak an party kalphung a innghat a. Central lama an chak chuan helamah pawh chak chhuak mai tura ngaih an ni a. Helaia an party hruaituah thui tak an inghat bawk a ni. Engpawh nise, tunah chuan opposition niin pathumna dunhmun hauhtu an ni a. Mahse, opposition party lian an nih angin ram ro inrelnaah an kalphung hian nghawng thui tak a nei tho bawk. Hruaitu thar nei party awmchhun an nih hmel a. An kalphungah hian kan ram hmalam hun hi thui tak a innghat dawn a ni.
Ruling party ni zo hlim hlawt Mnf party pawhin hruaitu thar an thlang thuai dawn a. Anni hian an president ngai Pu Zoramthanga chu president ah an la nei dawn niin a lang a. Opposition party lian leh Mla pawh 10 lai nei an ni a. Hun lokal turah kan ram tan an pawimawh em em a. An president chu a ngai pawh nise a kum lamah a upat tawh avangin a hnuaia a kaihhruai tu emaw hian an la thlak chho thuai dawn niin a lang a. Chumi atan chuan hotu pawh an han inchhawp chho tan niin a lang bawk. An han inrem chhoh danah hian an senior vice president Dr R. Lalthangliana hian term lehah chuan CM candidate niin a ho dawn tih a lang a. An senior vice hi kum 30 chuan Mla lo ni ve tawh thinin experience nei ngah a ni a. An president hi lo upa in chak lo deuh mahse kan ram tan Mnf kal dan hian kan ram hmalamah pawimawhna nasa tak an nei zel dawn niin a lang a. An kalphunga mizo hnam issue hi an vuak len zel phei chuan ruling tan englai pawha venthawn ngai an ni dawn a ni.
Central lama sawrkarna chelh mektu bjp hi awm ve bawk mahse sawrkarna siam leh ram kaihhruaiah chuan mipui hian kan la thlang tling mai dawnin a lang lova. Amaherawhchu central sawrkar fatlum an nih angin an thu leh hla erawh ngaihchan an ngai viau thung. Engpawh nise, kumin chhunga kan party lian pathum insingsa hi kan ram hmalam hriltu an nih avangin mipui chuan uluk takin kan thlir dawn a. An hotu thlan tharte kaldanah kan in nghah avangin an zia kan en uluk a ngai hle dawn a ni.