Arunachal Pradesh a khelh mek 77 Santosh Ttophy 2023-24 khelh mekah Mizoram in chak an harsat a. Maharashtra lakah an tlawm hnuin Inrinni khan champion lai Karnatana lakah si hnih faia an hmahruaina an hum zo lova, 2-2 in an inhnehtawk. Mizoram hian Delhi an hmachhawn zui leh dawn a, quarter-final luh beisei zui turin chak an mamawh.
Mizoram hi Maharashtra lakah uiawm taka an tlawm hnuin an insiamtha a, champion lai Karnataka lakah champion phuin an inlan. Golden Jubilee Stadium, Yupia a Karnataka an hmachhawn tum hian minute 13-na lekah Ms Dawngliana chuan hmahruaina goal a thun a, bul an tan tha hle. Chawlhlawk hmain Mizoram in an goal an venghim hram a, si khata hmahruai chungin chawlhlawk an hmang.
Chawlhlawk hnu lamah Mizoram in goal an thun leh thuai. Second half tan atanga minute hnihna lekah Mc Malsawmzuala chuan an goal hnihna a thun a, an hmahruaina a tizau. Si hnih faia hma an hruai vangin Mizoram hian chak theihna hun tha tak an nei a, point thum an hmuh a rinawm hman hial.
Si hnih fai ngawtin hnufual tawh mah se Karnataka in champion zia an chhuah. Hnufual zawk an nih vangin an buai lova, an zam hek lo. Na takin an khingpuite an nawr a, game thunnun zawk leh fitness tha zawk an nih an chhawr tangkai a, goal hnih thunin tlawm an pumpelh ta nge nge. Karnataka tan hian Prabin Tigga chuan minute 67-naah goal thunin an si phurh a sut. Tigga goal thun hnuin goal an thun belh leh thuai a, minute 69-naah Vishal R chuan an goal hnihna a thun a, an si phurh a sut zo.
Goal hnih ve ve an thun hnuin Karnataka an khel tha zui viau a, Mizoram an him hram hram a ni ber. Goal dang luh belh lovin inkhel a tawp a, Mizoram in chak theihna hun tha an neih chu uiawm takin an hloh. Karnataka lakah an chak zawh loh vangin Mizoram hian hmabak hautak zawk an hmachhawn a ngai a, quarter-final lut turin an tan tlawm a thiang tawh lo a ni ber tawh. Mizoram hian Delhi leh Manipur an hmachhawn zui leh ang.
Vawiin chawhma dar 10:00 a Mizoram hmachhawn tur Delhi hian Inrinni khan Railways chu 4-0 ngawtin an sawp a. Point li hmuin Group B hmahruaitu an ni mek. Mizoram hian point khat chauh an la hmu thung a, Delhi lakah an tlawm a nih chuan quarter-final luh beiseina a thamral hial tawh ang. Delhi an hneh a nih erawh chuan quarter-final luh phak beiseina a sang zui viau thung ang. Mizoram team leh player thenkhat ten football ngainatute beisei an phak lo a, sawiselna thawm pawh a ring hle. Inelna a kal mek a, khelmualah fiahna hautak hmachhawn tur a la awm vangin tun hi insawisel hun a ni lova, hlawhtlinna chang tura tanrul hun, infuih phur hun a ni zawk e! Inelna zawh hunah sawi tur kan neihte kan la sawi zawk dawn nia. Chu pawh hmasawn duh vanga kan sawi turte chauh sawi nan.
Inrinni a inkhel dangah Mizoram elpui lian Manipur chuan Mizoram hnehtu Maharashtra chu 2-1 in an hneh a, point thum hlu tak an hmu. Manipur hian khelh hnih atangin point 4 an hmu tawh a, Group B-ah pahnihna an ni mek.