Urban Development & Poverty Alleviation Minister K.Sapdanga’n Aizawl khawpui tui tlan Tlawnga bawlhhlawh lut thin thenfaina ‘waste trap’ siam a ni dawn tih a sawi.
Inrinnia Aizawl Municipal Corporation (AMC) buatsaih Lammuala Aizawl Day 2024 lawmna kharna hun hmanpuitu UD&PA Minister K Sapdanga hian AMC-in tun hnaia property tax-ah hma a lak that avangin SASCI atangin sum thahnem tak dawn a nih thu a sawi a. He sum hmang hian AMC mamawh hrang hrang siam a nih thu sawiin, AMC pisa sak nan Rs vbc 30 leh AMC building sak nan Rs vbc 20 pek an ni dawn tih a sawi.
K Sapdanga hian Aizawl khawpui tui tlan, Tlawng lui chawmtu a bawlhhlawh lut zel tur venna leh thenfai nan ‘waste trap’ siam a nih tur thu sawiin, hemi atan AMC hnenah AMRUT atangin Rs vbc 2 pek an ni dawn tih a sawi bawk.
UD&PA minister hian Tuiriala bawlhhlawh sawngbawlna Solid Waste Management Centre (SWMC) tihchangtlun nan ruahmanna siam a nih thu leh, Aizawl chhim lam tan Hualngohmunah bawlhhlawh sawngbawlna hmun tur buaipui mek a nih thu te, Aizawl tlak lam tan Luangmualah plastic sawngbawlna hmun siam mek a nih thu a sawi a. Hengte hi tihpuitlin a nih hunah chuan awmze nei zawka then darhin, Aizawl khawpui bawlhhhlawh sawngbawlna awmze nei zawka kalpui beisei a nih thu a sawi.
February 21, 2024 atang khan Aizawl Day hi AMC buatsaihin Lammualah lawmna hun hman a ni a. Inrinni khan a kharna inkhawm hi Organising chairman, Corporator Laltlanzova Khiangte kaihhruaiin neih a ni a. He hunah hian Aizawl Mayor Lalrinenga Sailo pawhin thu a sawi a ni.