Aizawl : 20th BN BSF, Zotlang Lunglei chuan nimin khan Chhapi khua, Lawngtlai dist-ah Civic Action Programme (CAP) hnuaiah school naupang leh khaw mipuite tan thilpek an pe.
Comd. Sh Neeraj Sharma chuan BSF te hian ramri chauh an veng lova, ramri a cheng te khawsak dinhmun chawikang tura hmalakna pawh an ngaihpawimawh thu a sawi a. Ramria cheng te nen thawhhona tha a awm chauhin heng hmasawnna te hi a hlawhtling thei tih sawiin, hun lo kal zel turah pawh thawk tlang zel turin BSF te chu an inring reng tih a sawi.
Chhapi khua sikul naupang tan Solar street light, school bag, note bu, Geometry box, marker, pencil, steel almirah, Iron desh bench te leh Tuizem te pein, vantlang tan syntex, carrom board, volley ball leh net bakah football te an pe a ni.