Pathianni zan khan English Carabao Cup final khelh a ni a, inkhel hmuhnawm takah Liverpool chuan si khat faiin Chelsea an hneh a, League Cup-ah a vawi 10 nan an champion. Liverpool in a tha lama hnuhma thar an hnutchhiah laiin Chelsea erawh chu tualchhung cup final-ah vawi ruk ngawt an tlawm zawn a, hnuhma tha lo tak an hnutchhiah ve thung.
Khelmual ropui Wembley Stadium-ah Chelsea leh Liverpool ten inkhel hmuhnawm an lantir a, an inhnehtawk hle. Reds hi hliamin a tibuai nsa hle a, final-ah hian an player pawimawh Alison Becker, Mohamed Salah, Darwin Nunez, Dominik Szoboszlai, Curtis Jones, Diogo Jota, Trent Alexander-Arnold leh Thiago te an chhawr thei lo vek a, Chawlhlawk hmain an midfielder Ryan Gravenberch chu hliam vangin lakchhuah a ngai leh cheu bawk. An that dan berin inlan thei lo mah se Chelsea lakah huaisen takin an inlan a, vannei zawkah an tang zui ta nghe nghe.
EPL lama chetha lo Chelsea hian an trophy lak theih hnai vai ber Carabao Cup-ah champion ngei an tum hle a, an khel tha viau bawk. Chawlhlawk hmain Raheem Sterling chuan Nicolas Jackson cross atangin hmahruaina goal a thun a. Ball cross tu Jackson hi a lo offside vangin Sterling goal hi hnawl a ni leh ta thung. Goal thun tuma an innawr tawn nasa viau chungin chawlhlawk hmain goal thun thei an awm lo.
Chawlhlawk hnu lamah inkhel a hmuhnawm zui viau a, Liverpool in goal an thun ve ta thung. Robertson free kick pet tha tak chu Virgil van Dijk chuan fuh zetin a tauh goal a, hmahruaina goal a thun. VAR hmanga endik a nih hnuin Wataru Endo a foul tih hmuhchhuah a ni a, Van Dijk goal hi hnawl a ni ve leh. Van Dijk goal hnawl hnawl a nih hnu hian Chelsea in goal an thun teuh hle a, midfielder Conor Gallagher chu si nghak tan dan rual ni lo mahse goal post a per hlauh a, Liverpool an him hlauh.
An goal thun hnawl a nih ve ve hnuin hun pangngaiah chak zawk an awm thei lova, extratime khelh chhunzawm a ni. Extratime-ah Chelsea an hlauhawm viau a, goal thun theihna hun tha an neih chu uiawm takin an hlah. Hun pek belhah pawh hian goal thun thei an awm mai lova, penalty shoot-out hmangin champion tur zawn a ngai ngei dawn niin a lang hman. Penalty an pet rin a nih thup tawh laiin Reds captain Virgil van Dijk chuan Tsimikas corner pet chu sawisel rual loha tha, dik leh felfaiin minute 118-naah a tauh goal ta mai a, Liverpool hmahruaina goal a thun ta nghe nghe. Hun tawp dawn tepa an si phurh hi Chelsea hian an sut thei tawh lova, final-ah an vanduai leh ta nge nge a. Ropui taka Liverpool champion lai chu hnai tak atangin an thlir.
English club hlun leh ropui Liverpool hi League Cup-ah vawi 10 an champion na a ni a, League Cup-a champion ngun ber a ni. Wembley a vanduai thei tak Chelsea chu Wembley-ah ngei an vanduai leh a, tualchhung Cup final an khelh hnuhnungah an tlawm zawn vek a, hun thimin a kiansan hleithei meuh lo.
Season tawp ruala Liverpool chhuahsan tur manager Jurgen Klopp chuan Chelsea hneha an champion chu an champion tawhna zawnga champion na hlu bik a nih thu a sawi. Player tha an inhliam thup vangin kum naupang leh tawnhriat nei tlem zawkte loh theih lohin a chhawr a ngai a. Rawlthar rualte nen ngeia an champion chu an champion na ti hlu leh zualtu a nih thu a sawi tel bawk.