Kum 2024 Formula 1 season chu tunkar atangin tan a ni dawn. Inrinni zan dar 8:30 ah Sakhir thlaler a intlansiak tlankawng Bahrain International Circuit-ah Bahrain Grand Prix tlanin season thar bul tan a ni ang.
Season liamta khan a zawna vawi thumna ni turin Red Bull Racing car khalhtu Max Verstappen a champion a, ani leh a team Red Bull Racing te hian inelna an thunun hneh. Kuminah an lallukhum chhuhsak thei an awm ang em tih chu zawhna a ni.
Kar hmasa khan Sakhir thlalerah hian F1 team ten season thar atana inbuatsaihna pre-season testing ni thum chhung an nei a, season thar boruak tinungtu niin pre-season test ah hian thil engmah chiang taka sawi fak theih ni lovin team zawng zawngin an theihna tak tak tilang tha duh ngai lo mahse a lang thei chin piahlam boruak a ngaihnawm a, eng ang nge beisei tur tih lo inrinsiak nawm lai a ni bawk.
- Red Bull leh Verstappen an fal zel dawn?
F1 preseason test-ah hian team hrang hrangin an car an enchhin kual thin, hei vang ‘lap time’ an lakte hi intehna dik a ni ngai lo. Tlanchak aiin car theihna hriatchian kha team thupui a ni miau a, hei vang hian tuialhthei an paitir dante a inang lova, tlankawng lum deuh lai leh daih deuhlai a enchhin duhte an awm. Tyre compound hman pawh a inang lo fo thin.
Hetiang a ni chungin Red Bull Racing hi a ni hmasa ber atangin an langsar a, nikum lama hlawhtling taka an hman an car design chu an tidanglam nual chung pawhin an tlanchak leh thei viau.
Pre-season ah lap time tha ber nei an ni lo chungin team dangten tyre nem leh tlanchak theihna zawk an hmang chungin an tlanchak zawng chu tyre sak zawkin an pha thuak thin.
F1 lamin zirchianna chi hrang hrang an lakkhawm atangin car tlanchak theih dan ang ber (Qualifying Simulation) a team ten an car an remin Red Bull hi anmahni hnaih bertu Ferrari aiin second 0.220 vel laiin an la tlanchak thei zawk niin an ngai.
Zirchianna dangah an car in tyre a ei nat zawng chu team lian dangte aiin a na lo zawk niin an sawi tel leh bawk a, hei vang hian season liamta tawp an kharna atangin bul an tan lehnghal dawn nia ngaihna a lian.
Driver-te leh team dangte rindan pawh niin Ferrari car khalhtu Charles Leclerc bakah Mercedes driver pahnih George Russell leh Lewis Hamilton te chuan an fak a, an fal lehnghal an rin thu an lo sawi ve bawk.
- Tute nge um ang?
Champion leh chungnung tura rin an awm nghal. Tute nge el pha ang tih zawhna a hring chhuak. He dinhmun inchuh tur hi team hnih tal an awm dawn niin a lang.
Italian team Ferrari hi nikumah RBR tih lova intlansiak a pakhatna hauh thei awmchhun an ni. Tun tumah hian Red Bull pha lovin la inngai mahse nikum aiin an car in hma a sawn niin an sawi.
Kum hmasa lamah Ferrari hian qualiyfing-ah pole position vawi sarih an chang thei – hei hian tlan chak hrim hrimah Red Bull an elpha tih a lantir. Mahse an car khalh a harsa nia sawi a nih bakah an buaina lian tak chu tyre-ah a ni a. Tyre an heh bik avangin intlansiak pumpui chhunga an tlanchak zawng ‘race pace’ ah an elpuite lakah an buai leh thin.
Tun pre-season ah erawh helamah hian hma an sawn niin zirchianna lamah a lang a, chutihrualin Red Bull nena an inkar inthlauhna nawtreh pha a nih erawh an beisei nghal lo.
Leclerc chuan, “Nikum lamah car khalh harsa tak kan neih avangin kuminah helamah hian hmasawn kan duh a, a zia sawt viau chuan ka hria. Red Bull erawh kan tehfung ber an la ni reng.” a ti.
Mercedes in season tawp lamah Ferrari an el a, team inelnaah an khum thei. Chutihrualin tun pre-season test ah ‘qualiftying pace’ lamah erawh zirchiannaah an pha lova, mahse ‘race pace’ ah erawh second 0.020 velin an tha zawk niin a lang.
Anni pahnih hi kumtluana inel tur an nih leh ngei a rinawm. Nikum lama beisei khum McLaren F1 Team leh Aston Martin Aramco F1 Team-te pawh awm mahse kuminah hma an sawn chhunzawm thei ang em tih zawhna a awm.
- Driver Bazar
Formula 1 khawvel sawinghing dawt thei turin tun thla tirah thil a thleng a, nghawng a nei thui dawn. Vawi sarih world champion ni tawh, mi tam takin driver ropui bera an chhal Lewis Hamilton chuan Mercedes chhuahsanin nakkumah Ferrari car a khalh tur thu a sawi.
Kum 39 mi hian Italian team ah hian kum khat aia rei contract a ziak tih puan a ni a, khawvela infiammi hlawh hnem falte zingah a tel leh dawn. Hamilton hian world champion nih leh a la duh a, Ferrari legend Michael Schumacher nen tunah hian world title an lak zat a inang mek a, German mihrâng hi khum a duh.
Ferrari in tunah hian driver hmabak nei eng tak Charles Leclerc an nei a, Spanish driver tha Carlos Sainz an kawl bawk. Monagasque driver Leclerc hian tun season chawlh laiin contract thar a ziak a, hei vang hian Sainz a chhuak dawn.
Nikuma Red Bull car ni lo pakhatna nihpui thei awmchhun Sainz hi khawiah nge a kal ang tih inrinsiak a ni nghal. Kar hmasa khan a pa, World Rally Champion vawi hnih ni tawh Carlos Sainz Sr. chu Red Bull Racing hotute nen an inkawm lai hmuh a ni a, an chanchin a ngaihnawm dawn.
Red Bull Racing in Mexican driver Sergio Perez an nei mek, amaherawhchu Max Verstappen-a teammate hian tunhnaiah beisei a pha lo leh thin. Tun season thleng bak contract a nei tawh lova, thlak a nih mai ring an tam. Ferrari chetdan leh Sainz-a thawm avangin ngaihven a hlawh lehzual ang.
Mercedes lamah Hamilton-a thlaktu tur a ngai dawn bawk. British driver theihna nei sang George Russell chu an no.1 driver tura ngaih a ni tawh a, contract rei an hnenah a nei. A teammate tur erawh tunge tih zawhna a lian.
British team Williams a beisei khum a che tha Alexander Albon hming a ri ring. Anni leh Mercedes hi team inkar tha an ni a, hei vang hian Albon hi an tan lakluh theihna kawng a awm niin tam takin an ngai. Ani bakah hian kum 2019 a Mercedes in an Junior Team a an lakluh kum 17 mi Andrea Kimi Antonelli pawh sawirik a ni.
- Thil dang
Kuminah intlansiak 24 awm tura ruahman a ni a, hei hi season khata intlansiak a la tam ber tum a ni ang. Intlansiak paruk – Chinese, Miami, Austrian, United States, São Paulo leh Qatar Grand Prix ah te Sprint Race neih a ni leh bawk ang.
A baka kalphung tihdanglam langsar thenkhat zingah driver tinin season tluan a power unit an hman theih zat chu pathum atang pali ah tihpun a ni a. Pali aia tam an hman chinah hremna an hmachhawn thei dawn a ni.