AZL: Congress Legislature Party (CLP) Leader hlui, Zodintluanga Ralte chuan mipui hnena an intiam ang ngeiin hmunphiah leinaah ‘price support’ pe turin ZPM kaihhruai Mizoram sorkar a phut.
Inrinnia Congress party hruaituten tun hnaia MPCC party hruaitu thlanna neih zawh taka thlirletna an neihnaah Zodintluanga Ralte chuan, ZPM kaihhruai sorkar chu thuneihna changa an sorkar hmaa mipui hnena thlai thar leina kawnga a intiam anga hma la lohah a puh.
Zodintluanga Ralte chuan thlai thar lei a hun a, an thlai rate puan sa hmunphiah chingtute chu mangang taka awmin ZPM sorkar hmaa an hralh theihna ang pawhin an hralh thei ta lo tih sawiin, “Chhuang taka thlai thar leina turin Rs vbc. 110 kan dah ti siin, sorkar rate aia hniama hmunphiah hralh mektu hian Rs vbc. 110 atang hian Re 1 pawh an dawng si lo. Hmunphiah chingtu an indawm kun mek a ni,” tiin, thlai thar leina atana an dah tak tak a nih chuan hmunphiah chingtute hi ‘price support’ pe ngei turin sorkar a phut tih a sawi.