Indian Railways chuan a khalhtu awm lova km 70 chuang bungraw phur chi rel tlan chu chhui chian turin a ti.
Social media-a video thehdarhah chuan he ral hian chak takin station eng emaw zat a tlan pel tih a lang.
Rel hi a khalhtu awm lovin Kathua, Jammu & Kashmir atangin Hoshiarpur district, Punjab thleng Pathianni khan a tlan a ni.
Railways chuan rel hi an tiding a, tumah hliam tuar an awm lo hlauh niin a sawi.
Thuneitute chuan he thil hi Pathianni zing dar 7:25 leh dar 9:00 inkara thleng niin Press Trust of India (PTI) news agency hnenah an sawi.
Wagon 53 zet nei rel hian lung nawi a phur a, Punjab panin Jammu atangin a tlan a, Kathua-ah hian a thawktute inthlak turin a ding a ni.
Thuneitute chuan rel kawng awih tlan deuhva a ding chu a khalhtu leh a puitu an chhuk fel hnuah amahin a lir ta mai niin an sawi.
Darkar khata km 100 dawna chaka tlanin a din hma zawng hian station panga chuang a tlan pel hman a ni.
A khalhtu awm lovin a tlan tih hriat a nih veleh hian a kawng zawh laia awm intawhna lai zawng zawng chu khar nghal vek a ni.
“Rel hi thuneituten a kawnga thing tum lian tak tak lo dahin an tiding a ni,” tiin thuneitute chuan PTI hnenah an sawi.
Thing tum hian a tlan chak lutuk chu a tiziaawm thei a ni.
Thuneitute chuan a thlen nawn tawh lohna turin Kathua atanga amah a tlan ngawt dan hi chhui chian a ni dawn tih PTI hnenah an sawi.