Mauritius chuan Norwegian cruise ship-a chuangte zingah tuihri a darh chiam nia hriat a nih avang leh khawmuala a darh zui an hlauh avangin an khawpui, Port Louis-a a innghah an phal lo.
Norwegian Dawn-a chuang zinga mi 15 vel hi an awm a nawm loh avangin a hranga dah mek an ni.
Mauritian thuneitute chuan an lawng chawlh hmuna dintir hi ‘hriselna dinhmun atan hlauhawm tak’ a nih avangin an ti thei lo niin an sawi.
Pathianni khan sample lak a ni tawh a, endik tur niin Thawhlehni hian a result a chhuah hman beisei a ni.
Mi chuangte hian South Africa-a an zin laiin an pum lam nuam lo an sawi tan niin Norwegian Cruise Line Holdings aiawh chuan a sawi.
A chuang zinga mi, Dutch chuan BN DeStem hnenah captain-in an lawngah chuan tuihri a darh mek a ni thei tih a sawi tih a hrilh.
Tun hnaiah Africa chhim lamah tuihri hi a leng nasa hle a, Zambia chu a tuar na ber zinga mi a ni.
January, 2023 atang khan Africa chhim lam ram pasarihah tuihri vei hi mi 1,88,000 vel an awm tawh niin UN chuan a sawi a. Mi 3,000 chuangin an thihpui.
Mauritius Ports Authority chuan, “Lawnga chuangte hriselna leh himna bakah kan ram pum himna hi kan ngaih pawimawh ber a ni,” an ti.
Lawng hian Inrinni zan khan Mauritius a thleng a, Réunion Island-a chawl tur a nih laiin an din loh avangin thlen hun tura ruahman aia hma ni khatah an thleng.
Lawng lianah hian passenger 2,184 leh thawktu 1,026 an chuang a. Port Louis-ah hian mi 2,000 chuang zet an chhuk ang a, mi 2,000 vel bawk chuang thar tur an awm dawn a ni.
Chhuk tur leh chuang turte hi February 27 vel thlengin an awm dawn niin Norwegian Cruise Line thupuangtu chuan a sawi.