Aizawl: Prime Minister Narendra Modi-a’n nimin khan biak hmuh theihna (video conference) hmangin Bairabi leh Sairang inkar rel kawng siam a hawng.
Prime minister hian ram chhung hmun hrang hranga rel kawng siam zawh tawh 554 leh hma thar lakna tur hrang hrang 1,500 chu New Delhi atangin a hawng a. He hun hi Mizoramah pawh Sairanga rel station atangin Transport Minister Vanlalhlana leh Lok Sabha MP C. Lalrosanga ten an chhim.
Hemi puala Sairang Rel Station-a inkhawm buatsaihah transport minister chuan km 51.38-a thui Bairabi atanga Sairang rel kawng siam hna chu December 15, 2015 atanga thawh tan niin station pali – Sairang, Mualkhang, Hortoki leh Kawnpui te siam mek a nih thu a sawi a. Tun dinhmunah hna hi zaa 92 thawh zawh tawh a nih thu leh kumin October hian thawh zawh hman beisei a nih thu a sawi.
Transport minister hian July 24, 2023 khan railways ministry-in km 223-a thui rel kawng, Sairang atanga Hmawngbuchhuah atan final location survey chu sanction a nih tawh thu leh sorkar pawhin a ngaih pawimawh thu a sawi a. Rel lo lutin hmasawnna leh hna tam tak a ken tel tur chu hnam dang thawh atan dah lo va, a ram mite ngeiin thawh tum a pawimawh thu a sawi.
Act East Policy hnuaia ram dang nen insumdawn tawnna kawtchhuah a nih huna ei zawnna atana hmang thei tura hmalak a tul thu sawiin, “Hmasawnna lo thleng tur chu ram mipuiten a tha zawnga chhawr ngei turin tun atanga nasa taka lo inpuahchah a tul a ni,” a ti.
Lok Sabha MP C. Lalrosanga pawhin Mizorama rel kawng siamna leh a kaihhnawih hnaahte tual chhung mite a tam thei ang ber chhawr a tul sawiin, hemi atan hian Mizoram sorkar leh railways thuneitute hma la turin a ngen a. Relin Sairang a lo luh a, Hmawngbuchhuah thlenga a kal hunah phalna nei lo leh dan lo anga hnam dang lut an awm lohna tura ruahmanna siam turin Mizoram sorkar leh railways thuneitute a ngen bawk.