Aizawl: Home Minister K Sapdanga’n Mizoram Police hnuaiah hna ruak hnawh khah loh 4,268 a awm a, chungte chu hnawh khah tumna awm thu house a hrilh.
Nimin Assembly session-a zawhna leh chhanna hunah member-te zawhna chhangin jome minister chuan police post ruak awm zat hi a sawi a, hna ruakte chu hnawh khah tum ni mah se vawi leh khata hnawh khah vek sen rual a ni lo tih te, tlem tlema hnawh khah tumna a awm thu leh hna ruak hnawh khat turin dan ding lai angin hnathawk tur an lak tur thu a sawi.
Dan loa kuhva rah tlawh ruk chungchang zawhna chhangin Home Minister Sapdanga chuan tun sorkar tharah hian dan lova kuhva tawlh ruk bag 2,868 an man tawh thu a sawi a, zawh belhna chhang chhunzawmin kuhva tawlhruk an mante chu kawl that mek a ni a, a mawhphurtu police-in an mante chu hren mek an ni tih leh tunah hian an thubuai chu ngaihtuah mek a nih thu a sawi.
Hmun hran hrana kudamah kuhva ro dah a awm nia sawi chungchang chu sorkarin a hre lo a, report pawh an dawng lo tih a sawi rualin house member-te chu dan loa kuhva rah tawlh kudama dah hria an awm chu chiang kuang deuh zawka sorkarah report turin a sawm.
Home minister chuan Mizoram chhunga jail hrang hrangte chu a tawt hle a, tang awm thei bituk zat aia tam an tang deuh vek tih sawiin, jail chhungte chu siam thar a ngai hle a, hmun thenkhatah chuan jail hungna atan rangvate hmangin jail tang zingah zan lama nula rima chhuaka haw veleh ta mai thinte pawh an awm nia sawi a awm thute a sawi.
Chutiang a nih avang chuan Mizorama jail-te chu thuam that a ngai nasa hle tih a sawiin, SASCI atangin Rs. vaibelchhe 55 an dawng dawn a, chu sum hmang chuan jail zawng zawng thuam that an tum thu a sawi bawk a ni.