RTI Act 2005 leh Mizoram RTI Rules 2010 chung- changah nimin khan Saitual DC office ah Chief Information Co- mmissioner hovin training neih a ni a. CIC John Neihlaia chuan RTI chu hriatchian a ngai hle tih sawiin, RTI section 2 J (1) phei chuan hnathawh a hm- un a va endik (inspection of work)te thlengin a huam tih a sawi.
RTI Act sual chhuah hun chhung chu rei tak a nih thu sawiin, British hunlai atang tawha dan chhawm chhoh tam tak, sawrkarin relbawlna thuruk ni thin chu RTI hian langtlangin a lo siam ta tih a sawi.
CIC chuan sawrkar hnathawk ten RTI chu hna pawimawh bera an ngaih loh thin avangin a pek chhuah kawngah an khaihlak thin niin a sawi a. Sawrkar hnat- hawkte chu mipui chhiahhlawh angin insawi mah ila kan rilru ah kan inpawm thei tak tak thin lova, chuvang chuan mipuite nen kan inkar ah langtlang lo tam tak a awm phah thin a ni, a ti.
Mi ram te ngaihtuah chuan Mizorama RTI lut chu a la tlem hle niin a sawi a. A zawttu te pawhin an chhanna dawnah te an lungawi hma hle niin a sawi a. VC te pawh an hna- thawhte mipuiin an zawhnate leh an hnathawh dan an hriat duh te LAD ah emaw a department concern ah zawt kher lovin anmahni chu SPIO ah rawn siamin RTI chu mipuite tan an rawn chhawp hnai a ni, a ti a. Heng zawng zawng avang hian RTI tihlawhtling tur chuan kan zaa mawhphurhna kan neih thu a sawi bawk.
Secretary, Mizoram Information Commission H Dolianbuaia training hi kaihruaiin, Information Commission chu langtlang inrelbawlna a awm theih nan thuneihna sang tak pek a ni, a ti a. RTI hmanga mawhphurh- nate chu request ni lovin kan tih ngei ngei tur – mandatory a nih avangin RTI zawhnate chu namnul mai mai chi a ni lo a ni, a ti a. VC te chu SPIO an nih tawh dawn avangin uluk taka an training chu ngaihthla turin a chah bawka ni.
Saitual DC Dr Lalngura Tlau pawhin RTI lama hotu ten an hun chep tak kara Saituala training an lo pe thei chu a lawmawm hle a ni, a ti a. Department thenkhatah RTI a mahni nihna pawh la hrechianglo an awm chu pawi a tih thu sawiin, RTI chu India danpui, Fundamental Right hiala rinluh tawh, pawimawh tawpkhawk a ni, a ti a. Sawrkar hnathawk ten RTI pekchhuah chu keimahni tana thil pawi a nih loh tehreng nen hun thenkhatah an tikhawtlai thin chu hriatthiam har a tih thu sawiin, langtlang inrelbawlna nei tura tan la turin kalkhawmte chu a sawm bawk.
Saitual DC Conference Hall a RTI training ah hian Lily, Dep- uty Secretary Mizoram Information Commission chuan training pein zawhna leh chhannna hun hman nghal a ni a. Training ah hian Saituala Department hrang hranga DAA, Sapio leh SPIO te telin Saitual leh a chhehvel a khawtlang hruaitute leh tlawmngaipawl hruaitute thahnem tak an tel bawk.