Mizoram Assembly Budget Session neih mekah nimin khan ‘The Mizoram GST (amendment) Bill, 2024 chu sawiho a nih hnuah pawm a ni.
The Mizoram GST (Amendment) Bill, 2024 hi Minister K Sapdanga’n Taxation Minister Dr Vanlalthlana aiawhin House-ah a pu lutin, sawiho turin a chhawpchhuak a ni.
The Mizoram GST (Amendment) Bill, 2024 hi casino, horse racing leh online money gaming atanga GST lak anih theih nana GST dan siamthatna a ni. Heng thil pathum atang hian GST hi zaa 28 lak a ni.
He amendment hi India ram pum puiah October 1, 2023 atanga hman tura GST Council in thutlukna a siam tawh avangin, Mizoramah chuan ordinance hmanga hman a ni a. Tun session-ah hian Act a siam turin Bill hi put luh a ni.
The Constitution (One Hundred and First Amendment) Act, 2016 hmangin India ram pumpuiah GST Act hi July 1, 2017 atangin hman tan a ni a. Central Government leh State Government ten dual authority system a kalpui a ni a. Central GST Act, 2017 nena hmang kawp turin state tin ten mahni GST Act theuh an nei a. Mizoram pawhin the Mizoram Goods and Services Tax Act, 2017 kan nei ve a ni.
India ram pumah inang tlanga hman tura siam anih avangin GST Council remtihna a Central GST Act amend a nih hian state hrang hrangten an State GST Act theuh te an amend ve thin a ni.