Siaha District Legal Services Authority-in nimin khan ‘Skill Development for Prisoner’ hawnna inkhawm an buatsaih a. Judge, Fast Track Court-cum-Additional District and Sessions Judge, Siaha District Lalngaihmawia Zote chuan hmanpuiin, Secretary, District Legal Services Authority cum Chief Judicial Magistrate, Siaha District Lalhriatpuii’n hun a kaihhruai thung.
Secretary, District Legal Services Authority-cum-Chief Judicial Magistrate, Siaha District, chuan Skill Development programme hi District Jail, Siaha a vawikhat neihna a nih thu a sawi a. He programme atan hian trade 4 thlan niin – Arts, Handicraft, Barber leh Electric Wiring te an ni a. Heng trade zirtirtu tur atan hian Jail Staff, tang convict tawh leh pawnlam mi te thlan an ni a ti. Skill Development for Prisoner’ programme- in a tum ber chu ‘jail’ tang te ‘jail’ atanga an chhuah hnua an mahni kea an din theihna tura thiamna pek a nih thu a sawi.
Judge, Fast Track Court-cum-Additional District and Sessions Judge, Siaha District Lalngaihmawia Zote chuan District Legal Services Authority-in hetiang program an buatsaih chu tha a tih thu a sawi a. Jail tang ten an tui zawngte zira, thiamna leh eizawnna tlak tak tak zir thiam tura duhsakna hlanin fuihna thu a sawi a. Hlawhtlinna hi eng dinhmun atang pawha neih theih a nih thu sawiin, Jail tang ten he programme hi tangkai taka hmanga, hlawkna an chhar chhuah vek theih nan duhsakna a hlan bawk.
Superintendent, District Jail, Siaha HC. Lallianvuta chuan he programme hmang tura rawn kal zawng zawng te chunga lawmthu a sawi a. Hetiang programme – ‘Jail inmates’ te hlawkna tura buatsaih a ni chu lawmawm a tih thu sawiin ‘Jail inmates’ ten he programme hi hlawkpui taka hmang theuh turin duhsakna a hlan a. Jail tangte thil tisualtu ang mai chauha en lova, an hlawkna tura programme an siam avangin District Legal Services Authority- te chungahlawmthu a sawi bawk a ni.