Volodymyr Zelensky chuan Russia-in a rûn atangin Ukrainian sipai 31,000 zet an thi tawh tih a sawi.
Ukrainian president hian hliam tuar engzat nge awm tawh tih chu Russian sipaite ruahmanna siama pui theitu a nih dawn avangin a sawi lang duh lo thung.
Ukrainian thuneitute hian vantlang hriatah an sipai thi zat hi an puang ngai meuh lo va, mi dangin an chhutpui chu a tam thei hle.
Defence minister-in khawthlang ramten Ukraine an puihna tur thil zahve zet tihkhawtlai a nih avangin nunna leh ram tam tak chân phah tih a sawi hnu lawkah sipai thi zat hi puan a ni.
Zelensky hian Pathiannia sipai an chân tawh zat a sawi hi Russia-in a sawisak zat aia tlem daih a ni.
“He indonaah hian Ukrainian sipai 31,000 an thi tawh a. 3,00,000 emaw, 1,50,000 emaw a ni lo, Putin-a leh a lamhnaite hian dawt an sawi a ni. Eng pawh ni se, heng kan chânte hi chânna nasa tak a ni,” a ti.
Indonaah thil chân tam tak an nei tih Zelensky chuan a sawi a. An ram chin, Russia-in a luahsakah civil mi sang tel an thi a, an zat chiah erawh hriat a ni lo tih a sawi.
“Engzat chiah nge thi, thah, tihhlum leh sawisak an nih ka hre lo va, engzat nge ram pawna an thawn chhuah pawh ka hre lo,” a ti.
Ukraine hian indonaa a sipai hloh tawh zat hi a sawi ngai zen zen lo va, mi dangte chuan an chhutpui tam thin hle.
August thla khan US thuneitute chuan Ukrainian sipai 70,000 thah an ni tawh a, 1,20,000 velin hliam an tuar bawk niin a lo sawi daih tawh.
Zelensky-a chuan Russian sipai 1,80,000 zet an thi tawh a, sang telin hliam an tuar bawk niin a sawi.
BBC Russian chuan Mediazona website nena tangdunin Russian sipai thi 45,000 chuang an hre thei a; mahse, a tak taka chu hei aia tam daih an nih rin a ni.
February khan UK defence ministry chuan Russian sipai 3,50,000 zet thi leh hliam an awm tawh niin a sawi a ni.
President Zelensky-a hian an Defence Minister Rustam Umerov-a’n khawthlang ramten sipai lama an puihna tur tihkhawtlai a nih thu a sawi hnu lawkah hetiang hi a sawi ve.
“Tunah rih chuan an intiam ang hi kan la hmu lo,” a ti.
Ukraine hian tun lai hian an ram chin atanga Russia um chhuah an tumnaah an hlawhchham nasa hle a. Umerov-ah hian supply an hmuh that loh avangin indonaah hian an tuar niin a sawi.
“Tih theih leh tih theih loh thlengin kan ti a; mahse, a hun taka supply kan hmu lo hian min tichhia a ni,” a ti.
Germany chuan November daihah tawh khan European Union (EU)-in March thlaa laipui mu maktaduai khat pek a tum chu a takin a thleng hman dawn lo niin a lo sawi tawh.
January khan EU hian an intuam zinga zahve chauh a hunah a thleng hman dawn niin a sawi ta reng a ni.