Aizawl: Mizoram University (MZU) chuan nimin khan Convocation vawi 18-na an hman chu India Vice President Jagdeep Dhankar-a’n a hmanpui a, zirlai hlawhtlingte hnenah degree a hlan.
Tanhril-a MZU Campus-a hun hmanah Vice President Dhankar chuan zirlaite chu kumtluana an hahpui, rim taka lehkha zira an sual chhuah degree tha an nei thar chu a lawmpui tih a sawi a. Zirlaite chu mi dangte aia thawkrim tur leh an hmaah tih tur leh hmalak tur tam tak a awm tih hre turin a chah.
Vice president chuan Act East India hnuaia hmalakna hrang hrangte a tahtawlin tihhlawhtlin mek a nih thu leh thawh tur tam thu te, a bikin tourism huangah phei chuan thawh tur a tam dawn hle tih a sawi a. Thalaite chu India ram hmasawn leh than nasat lai takin an vanglai an hmang chu an vannei a tih thu a sawi a. Kum 2047-ah India ram chu ram hausa leh changkang a nih theihna atan sorkar laipuiin hma a la mek a, hemi atan hian Mizoram thalaite chu a thawh hlawk ber zingah tel tum turin a chah bawk.
Mizoram University Convocation vawi 18-na chu Registrar Prof Lalnundanga chuan Prof Dibakar Chandra Deka, Vice Chancellor, MZU phalna lain a hawng a. Vice chancellor-in inlawmna thu a sawi a. Degree hrang hranga Gold Medal leh prize dawngtuten vice president kut atangin degree leh medal te an dawng.
MZU Convocation-ah hian mi 7,980-in degree hlan an ni a. Convocation-a tel, mahni ngeia degree dawngtute chu Doctor of Philosophy-ah mi 110, mi 518 hnenah Master’s degree, mi 141 hnenah Master’s Professional, Course hrang hranga Bachelor’s Degree chu mi 271 hnena hlan niin, Gold Medalist 56 leh mi pasarih hnenah Book Prize hlan an ni bawk.
MZU Convocation-ah hian Larsap Dr Hari Babu Kambhampati, Chief Rector, MZU ni bawk, Chief Minister Lalduhoma leh Prof Prakash Bartunia te chu khualzahawm an ni.