Thawhtan zana English Premier League inkhel awmchhunah West Ham United chuan Jarrod Bowen hattrick hmangin an mikhual Brentford an hneh.
London club West Ham hian London Stadium-a an mikhual Brentford lakah bul an tan tha viau a, goal an thun hma hle. Inkhel tan atanga minute ngana lekah Jarrod Bowen chuan Emerson siamsak atangin hmahruaina goal a thun nghal. Hma taka goal an thun vangin an phur a, table hnuai lama goal Brenford lalakah an khel tha zui hle.
Minute ngana leka hmahruaina goal a thun hnuin Jarrod Bowen chuan minute 7-na lekah an goal hnihna a thun zui leh nghal zat a, an hmahruaina a tizau.
Minute sarih chhung lekin goal hnih chhuah hman mah se Brentford an hnual lova, mualneitu an chhang let ve thuai. Minute 13-naah Neal Maupay chuan goal thunin an si phurh a sut then. Maupay goal thun hnu hian inkhel a hmuhnawm zui viau a. Chawlhlawk hmain goal thun thei an awm tawh lova, Hammers in 2-1 a hmahruai chungin chawlhlawk an hmang.
Chawlhlawk hnu lamah West Ham an khel tha zui leh viau a, inhnaihchilh takin goal hnih an thun zawn leh. Goal hnih thun tawh Jarrod Bowen chuan minute 63-naah an goal thumna a thun a, hattrick a siam. Bowen goal thun atanga minut ruk hnu lekah Emerson chuan an goal lina a thun zui leh a, an hmahruaina a tizau. 4-1 an hnu fual hnuin Yoane Wissa chuan minute 82-naah an goal hnihna a thun ve leh a. An si phurh sut zawh tum viau mah se goal dang an thun belh thei tawh lova, West Ham lakah an tlawm zui ta a ni.
Brentford laka an chak hnuin West Ham manager David Moyes chuan season tawp hunah contract thar chungchang chu club nen an sawiho tur thu a sawi a. London Stadium atanga inputchhuah mai a la tum loh thu a sawi tel bawk.