India chuan nakuma van thengrenga zin chhuah a tum hmasak bera kal turin Air Force pilot pali a thlang chhuak ta.
Gaganyaan mission hmang hian astronaut pathum chu km 400-a hlaah lei hel tura kah chhuah an ni ang a, ni thum hnuah an lo kir leh ang.
India-a space agency Isro chuan van thengrenga mihring kap chhuak tur hian enchhinna hrang hrang a kalpui mek zel.
October khan zin chhuakte hi an chuanna rocket-ah harsatna lo awm palh ta se him takin an chhuak thei dawn em tih pawh enchhin a lo ni tawh.
He enchhinna hi an hlawhtlinpui hnuah kuminah hian Isro chuan van thengrengah robot a tir chhuak ang a, kum tharah mihring (astronaut) a tir dawn a ni.
Thawhlehnia chhim lam khawpui, Isro hmunpui pakhat ni bawk, Thiruvananthapuram-a hun hmanah astronaut tura duan palite hi pho chhuah niin ‘van thengrenga zin chhuak tura suangtuahna a taka chantirtu, adventurer leh mi huaisen’ tia sawi an ni.
Indian Air Force atanga thlan chhuah officer-te hi Group Captain Prashanth Balakrishnan Nair, Group Captain Ajit Krishnan, Group Captain Angad Pratap leh Wing Commander Shubhanshu Shukla te an ni.
Prime Minister Narendra Modi leh Isro chief S Somanath ten an kawrah badge tarsakin Modi-a chuan ‘India chhuanvawrte’ tiin a sawi.
“Mi pali ngawt tihna a ni lo va, thiltihtheihna pali, Indian tluklehdingawn 1.4-te châk kengtute an ni a. Ka lawmpui a, duhsakna sang ber ka hlan bawk,” a ti.
Thuneitute chuan heng mite hi Air Force pilot eng emaw zat atanga thlan chhuah an ni a, taksa leh rilru lama enchhinna tam tak paltlang hnua thlan chhuah an ni tih an sawi.
Russia-ah thla 13 lai training tawh an ni a, chumi hnuah an tih haw a. Anmahni pho chhuahnaa video tihchhuahah chuan gym-a an chetla lai te, tui an hleuh lai leh yoga an ti laite pawh a lang.
Thawhlehni vek khan Isro chuan Vyommitra, Sanskrit tawnga ‘space friend’ tihna, mihring anga siam hmeichhia, kumina van thengrenga robot an tirh chhuah tur pawh an pho lang bawk.
Gaganyaan Mission hi India-in van thengrenga mihring kah chhuah a tumna hmasa ber niin a hlawhtlin theih nan Isro centre hrang hrangah enchhinna leh inbuatsaihna kalpui a ni.
Sanskrit thumal niin ‘van lam pan thlawhna/lirthei’ tihna a ni a, Gaganyaan project hi Rs. tluklehdingawn 90 vel zel man a ni.
A hlawhtling thei a nih chuan Soviet Union, US leh China dawta van thengrenga mihring thawn chhuak thei leh hmasa ber a ni dawn a ni.
Nikum khan India hian van thengrengah hlawhtlinna ropui tak a lo chang tawh a. August thla khan rocket kap chhuakin tuma la tih theih ngai loh, thla chhimtawpah him takin a tum a ni.
A hnu lawkah scientist-ten Aditya-L1 an kap chhuak leh a, hei pawh hi India-in ni zirchiangtu tur a kah chhuah hmasak ber niin tunah hian ni a la hel mek a, solar system zirnaa atana pawimawh tak tak a hmu nual tawh.
India hian heng bakah hian hmathlir thui tak neiin kum 2035-ah hian space station din a tum mek a, kum 2040-ah thlaa mihring kah kai a tum bawk.