Lok Sabha inthlanpui lo awm turah BJP chuan an candidate tur a puang ta a. List an tihchhuah hmasak bera mi 195 hming tar chhuahah hian MP tanglai 33 chu hnawlin mi thar an dintir dawn.
BJP-in Inrinnia candidate tur an puanah hian Assam-a Lok Sabha bial 11 pawh an tel a. An zinga paruk chu MP tang lai niin panga chu mi thar an ni thung.
Party hian kum 2019 inthlanpuia Silchar bial atanga thlan tlin, Rajdeep Roy aia ding turin Parimal Suklabaidhya chu an ti.
Bijuli Kalita Medhi chu Gauhati Lok Sabha bialah an dintir dawn a, he bial hi Queen Oja-i vawn lai a ni a. Ranjit Dutta pawh Tezpur Lok Sabha bialah ding tura tih a ni a, kum 2019-ah khan Pallab Lochan Das-a’n hnehna a chang thung.
BJP hian Union Minister Sarbanand Sonowal chu Dibrugarh biala ding turin an ti bawk a, MP tanglai, Rameswar Teli chu an chawlhtir a ni.
Chhattisgarh bial 11-a ding tur pawh BJP hian an puang a, mi pali chu mi thar an ni.
Janjgir Champa (SC) bialah MP tang lai Guharam Ajgalley aiah Kamlesh Jangde a ding dawn a. Raipur-ah kum 2019-a thlan tlin, Sunil Kumar Soni chu paihin an hruaitu hlun, Brijmohan Agrawal an dintir ve thung ang.
Mahasamund bialah pawh BJP hian MP tang lai, Chunni Lal Sahu hnawlin Roop Kumari Choudhary a ding dawn a. Kanker (ST)-ah Mohan Mandavi chu Bhojraj Nag hmangin an thlak dawn bawk.
BJP hian Delhi-a bial ngaa ding tur an puan zinga pali chu mi thar an ni dawn bawk.
Chandani Chowk Lok Sabha Sabha bialah Praveen Khandelwal an dintir dawn a. Ani hian MP vawi hnih lo ni tawh leh union minister hlui, Harsh Vardhan a thlak ang.
West Delhi bialah BJP hian MP vawi hnih ni tawh, Parvesh Sahib Singh Verma chu thlakin Kamaljeet Sehrawat an dintir dawn a. BJP hruaitu hlun tak thi ta, Sushma Swaraj-i fanu, Bansuri Swaraj chu New Delhi Lok Sabha bialah dintirin Union Minister Meenakshi Lekhi a thlak ang.
South Delhi-ah Ramesh Bidhuri thlakin Ramvir Singh Bidhuri an dintir dawn bawk.
Gujarat-ah bial 15-a ding tur puangin MP tang lai panga an paih.
Banaskantha Lok Sabha bialah bialtu Prabhatbhai Savabhai Patel paihin Rekhaben Hiteshbhai Choudhary a ding dawn a. Ahmedabad West (SC) bialah Dineshbhai Kidarbhai Makwana chuan term thum zet MP ni tawh, Kirit Solanki a thlak bawk ang.
Rajkot Lok Sabha bialah Union Minister Parshottam Rupala a ding ang a, bialtu MP Mohanbhai Kalyanji Kundariya a thlak dawn.
Union Minister Mansukh Mandaviya chuan Porbandar bialah bialtu ni lai, Rameshbhai Lavjibhai Dhaduk a thlak dawn bawk.
Panchmahal bialah BJP hian bialtu ni lai, Ratansinh Magansinh Rathod hnawlin a aiah Rajpalsinh Mahendrasinh Jadhav an dintir ang.
Jharkhand-a Hazaribagh bialah BJP hian union minister hlui, Yashwant Sinha fapa, bialtu ni lai, Jayant Sinha thlakin Manish Jaiswal an dinti ang.
Lohardaga (ST) bialah term thum MP ni tawh, Sudarshan Bhagat chu Samir Oraon-a’n a thlak dawn bawk.
Madhya Pradesh-a candidate tur an puan tawh zingah pawh BJP hian MP tang lai pasarih an chawlhtir.
Bharat Singh Kushwaha chu Gwalior Lok Sabha bialah MP tang lai, Vivek Narayan Shejwalker aiawhtu turin an dintir.
Guna bialah pawh bialtu ni lai, Krishnapal Singh Yadav chu hnawlin Union Minister Jyotiraditya Scindia a ding ang.
BJP hian Lata Wankhede-i chu Sagar Lok Sabha bialah an dintir dawn a, he bial hi Rajbahadur Singh-a vawn lai a ni a. Virendra Khatik chu Tikamgarh (SC) bialah a ding bawk ang.
BJP hian Vidisha MP Ramakant Bhargava chu paihin a aiah Madhya Pradesh chief minister hlui, Shivraj Singh Chouhan chu an dintir thung ang.
Bhopal bialtu, Sadhvi Pragya Singh pawh hnawlin a bialah hian Alok Sharma an dintir ang.
Ratlam (ST) bialah BJP MP ni lai, Guman Singh Damor chu paihin Anita Nagar Singh Chauhan an dintir tawh dawn a ni.