Aizawl: Home Minister K. Sapdanga;n Inrinni khan Edenthar-ah The Pathway School a hawng.
Aizawl North III bialtu MLA ni bawk K Sapdanga hian hawnna inkhawmah thu sawiin, a bial chhungah tlema la chawisan ngai leh zual veng Edentharah school hawn a ni ta chu lawmawm a tih thu a sawi a. “Zirnaa inhmang thang em em chhungkuaten school an hawng hi a inhmeh a, harsatna hrang hrang a awm thin dan lo hrechiang vek tawh leh lo paltlang tawh ten hetianga ruahmanna tha tak neia school in rawn hawng hi a hlu hle,” tiin, Edenthar khawtlang tan mai ni lo, a bial chhunga veng hrang hrangten tangkai taka an hman ngei a beisei thu a sawi.
Chanchinbua ei zawng thin a nih thu sawiin K Sapdanga chuan, “Chanchinbu ka chhuah dawn hian copy chuti zat atang chuan chumi zat chu ka hlawh ve thei ang tih lam hi ka ngaihtuah ngai lo a, sumdawnna atan ni lo, ka mihringpuite tana rawngbawlna ka tih theih tawk kha tih tumin ka bei thin a, sumdawnna atan ringawt ni lo, he school atang hian ram rohlu chher chhuah a nih ngei ka beisei tlat a, hetiang institution hlawhtling tak ni tur hawng theia ka awm hi ka lawm a, he school hawn a nih theihna tura buaipuitu zawng zawng leh a thawktu zawng zawngte pawh duhsakna sang ber ka hlan a ni,” a ti.
School hawnna inkhawm hi Rita Vanlalchhanhimi, Administrator, The Pathway School chuan inlawmna hun hmangin school din a nih dan report a pe a, Rev. Sanghmingthanga chuan hunserh hmangin he school hi tawngtainain a hlan bawk.