Jammu & Kashmir-a Kupwara district-a ni thum zet inbeihna thleng tawhah CRPF 3 leh state police 2 an thi tawh a, firfiak pawl lama mi 2 kah hlum an ni tawh bawk.
Venhim hnathawktute zinga thi tawhte bakah hian 9-in hliam an tuar a. Hetih lai hian inbeihna thleng duh lova pungkhawm mipuite zinga mi an thi tawh bawk.
Defence thupuangtu chuan hel pawl kah hlumte ruang hi hmuh a ni a, an kut atang hian ralthuam leh puak thei dangte pawh hmuh a nih thu a sawi a, tute nge an nih erawh an la hre thei lo.
Kupwara-a inbeihna hi Ningani zana Handwara khuaa Babagund Langate venga hel an awm tih thu an dawn bawhzuia venhim hna thawktuten hma an lak atanga intan kha a ni a. An thu dawn ang ngei hian an lo awm a ni.
Para commando-in Army, CRPF leh Police Special Operations Group te zawmin inbeihna hi an la kalpui a. Inkahna hi nimin chawhnu lam khan a tawp tawh rih a; mahse, beihpui hi thlak chhunzawm niin civil mite chet vel an la remti rih lo.