Kum thum liam ta chhung khan India ram chhung, Jammu & Kashmir tih lovah firfiakte chetna liantham engmah a thleng lo va, a thleng awm chhun chu Amritsar-a November, 2018-a grenade puak chauh kha a ni.
Home ministry-in Lok Sabha inkhawm neih meka a tar lan dan chuan kum thum liam ta chhung hian Jammu & Kashmir erawh an buai hle a, firfiak chetna vawi 1,500 chuang a thleng tih tar lan a ni.
Amritsar-a grenade puak hi Adliwal venga prayer hall-a November 18, 2018-a thleng a ni a, mi 3 an thi niin union minister of state for home affairs G.Kishan Reddy chuan a sawi.
“He thilah hian Khalistan Liberation Force (KLF) leh International Sikh Youth Federation (ISYF) chu an inrawlh nia ngaih a ni a. Punjab Police hian mi 3 an man nghe nghe,” a ti.
Minister-in rorelna ina zawhna chhanga India rama firfiakte chetna a sawinaah 2017-19 inkar khan Jammu & Kashmir-ah chuan vawi 1,550 a thleng tih a tar lang a. Heng beihna thlengah hian venhim hnathawktu mi 251, civil mi 118 leh firfiak 627 an thi tih a sawi bawk.
Firfiakte chetna chhui chungchang zawhna a chhannaah minister chuan data chu ram danpuia Seventh Schedule-ah state sorkar kuta ‘Public Order’, ‘Police’ leh ‘Prison’ te dah a nih tak thu a sawi a. Sorkar laipui hnuaia chhui ngai bik chu National Investigation Agency (NIA)-in a chhui thin tih a sawi.
Minister chuan firfiakte chetna tuartu chhungte chu suma puih thin an nih thu a sawi a. State sorkarin civil mi thite leh an chhungte chu Rs Nuai 5-a puih zui thin an nih thu a sawi a, heng sumte hi sorkar laipuiah a dil leh (reimbursement) thin niin a sawi bawk.
“State sorkarte hian mi sualte chetna tuartu a puih dan hi an tih dan a inang lo nual bawk a, an policy azirn a ni,” a ti.
Reddy chuan civil mi ni lo, venhim hna thawktute pawh firfiakte kut tuara thite chu chhawmdawl zui thin an nih thu a sawi bawk.