Pathianni zinga NBA regular season khelhah player ropui LeBron James chuan hnuhma ropui a hnutchhiah a, NBA regular season-an point sing li khawl tling hmasa ber a ni. LeBron James-a’n record ropui a siam tum hian champion lai Denver Nuggets lakah LA Lakers an tlawm thung.
Champion lai Denver Nuggets lakah point 124-114-a LA Lakers an tlawm tum hian player ropui LeBron James chuan point 26 a thawkchhuak. Ti hian NBA regular season-ah point 40000 a khawl tling ta chiah a, NBA chanchinah point sing li khawl tling hmasa ber leh awmchhun a ni a, a record siam hi khum a har hle tawhin a rinawm.
Basketballer ropui sawi apianga sawi hmaih thiang tawh lo tur LeBron James hian October 2003 khan a vawi khat nan NBA a khel a, kum 21 zet hnuah pawh NBA-ah player tha ber pawl a la ni reng thei. February 2023 khan NBA-ah point 38.387 thawkchhuak tlingin, hun rei tak chhung NBA-a point thawkchhuak hnem ber lo awm tawh; Kareem Abdul-Jabbar record a khum. Abdul-Jabbar record a khum atanga kum khat hnuah NBA regular season-a point sing li thawkchhuak tling hmasa ber a ni zui leh a, mel lung pawimawh zawk a phun belh.
NBA-ah vawi li champion tawh a, tum li Most Valuable Player ni tawh bawk LeBron James NBA regular season-a point thawkchhuak hnem ber a nih bakah mel lung pawimawh tak tak pathum phun khawptu a ni bawk a. NBA a ball sawhlet dawng tam, assist ngah ber leh All-Star a tel zawn ngun ber record a kawl khawm bawk.
Khawvel ram ropui leh thil thithei ber USA ah chuan Basketball hi infiamna ngaihhlut hlawh tak a ni a. USA in a ngaihhlut vangin khawvelah pawh a lar chak hle nghe nghe a ni.