March 2, Inrinni khan Mizoram in fiahna hautak an paltlang a, si li faia Railways sawpin quarter-final an lut. Yupia, Arunachal Pradesh a khelh mek Fifa Santosh Trophy 2023-24-ah Mizoram hian quarter-final ah Kerala chu March 5, Thawhleh zan dar 7:00-ah an hmachhawn zui leh dawn.
Quarter-final lut tura chak ngei ngei mamawh Mizoram hi quarter-final lut chiang tawh Railways lakah chak ngei tumin an inlan. Golden Jubilee Stadium-ah Mizoram hian an phu ang ngeiin hnehna an chang a, an khingpuite hi 4-0 in an sawp. Railways lakah si li fai ngawta an chak vang leh inkhel hnuhnung zawkah Manipur in Delhi an hneh bawk vangin Group B pahnihna ni chungin Mizoram in group stage an paltlang.
Delhtu lian tak hnuaiah huaisen taka inlan Mizoram hian goal an thun thuai a, minute 17-na lekah Lalthathana chuan tha taka pet goal in, hmahruaina goal a thun. Hma taka goal an thun vangin 2014 a champion Mizoram an phur a, an khel tha zui hle. Chawlhlawk hmain goal thun theihna hun remchang an hmu nual naa Dawngtea vanneih ni a nih loh vangin goal dang an thun belh thei lo.
Chawlhlawk hnu lamah Railways an khel tha a, na takin Mizoram an nawr. Goal thun theihna hun tha nei bawk mah se uiawm takin an hlah a, Muanawma an paltlang thei lo. Muanawm’an Mizoram a chhan him hnu lawkah Mizoram fuh zetin an khingpuite an nawr let a, Vanlalbiaa chuan minute 82-naah goal thunin an hmahruaina a tizau. Mabiaa goal thun hnu lawk hian Mizoram in fuh zetin an nawr tlang leh a, own goal hmangin an hmahruaina an tizau.
Si thum fai ngawta hma an hruai tawh vangin Mizoram an thlamuang a, player an thlakthleng. Inelna neih meka boruak nei lian tak Malsawmfela luhtir a ni a, Sawmfela hian Mizoram aiawh tlak a nihzia goal hmangin a lantir. Minute 90+3 ah mawi taka ball inpe a, Railways tlarhnung an thiah hnuin Sawmfela hian pui takin Mizoram goal lina a thun a. Kum 2014 final-ah 3-0-a an lo sawp tawh Railways chu 4-0 in an sawp leh ngat a, Mizoramin quarter-final an lut ta a ni.
Inrinni a inkhel hnuhnung zawkah tlawm nei lova kaltluang Manipur in an hnuai chiaha awm Delhi chu 2-1 in an hneh a, group champion niin quarter-final an lut a. Manipur hian Assam an hmachhawn zui leh dawn. Group B atang hian Manipur, Mizoram, Delhi leh Railways ten quarter-final an lut. Group A atangin, Services, Goa, Kerala leh Assam te an tlang ve bawk.
Mizoram hian quarter-final-ah khingpui hautak an nei dawn a, Kerala an hmachhawn dawn. Santosh qualifying match-ah Kerala hian Mizoram hi an lo hneh tawh a, hneh nawn leh ngei turah ngaiin an huphurh dawn lo. Mizoram hian Kerala lakah tlawm nawn an tum lo hle dawn bawk a. March ni 5, Thawhleh zan dar 7:00 hian inkhel hmuhnawm an lantir ngei tura ngaih a ni. Mizoram in hlawhtlinna an chan theih nan Zofate i tawngtai theuh ang u.