- Tip 1: Ei leh in hrisel
A pawimawh dan hi sawi nep theih a ni lova, rualkhai taka chawtha leh hrisel tak ei hi tih makmawh a ni a, vitamin tha leh hrisel awmna ei leh in te hi hriat chian ngei ngei a ngai a ni.
Tin, tui in tam te, bawng-hnute leh protein tamna ei uar te pawh hi hriatreng a tha hle.
- Tip 2: Taksa chetna
Ni leng lenga khuma mut te, rei tak tak thut te hi a tha lo. Ke-a thui vak lo kal te, tuihleuh te hi a tha hle.
Nasa lutuk si lovin, a awm mawi tawkin taksa insawizawi-na lak thin tur a ni a, a tihdan leh kalphung tura hi doctor rawn mai a finthlak bawk.
- Tip 3: Chawlhhahdamna
Zanah hian darkar 8 emaw tal hi chu muthilh nan hman ngei ngei tur a ni a, chhun lamah pawh ni se, taksa-in ‘chawlh’ a ngiat a nih chuan chawlh sek pawh a pawi lo.
Tui taka mut hian rilruhahna te a umkiang thei a, fa neih hnu-ah i mu mai mai thei tawh dawn lo tih hrereng chungin tun hi hun tha a ni a, hmang tangkai ang che.
- Tip 4: Vitamin leh supplement
Thlaihnah leh Thlairah ei thei lo an awm a, Sa tithei thak lo an awm bawk.
Engpawhnise, ei leh in chungchangah harsatna a awmin, doctor remtihna nen vitamin leh supplement dangte hi ei ngei ngei tur a ni.
Hetah pawh hian ei tura bithliah dan dik taka ei thin tur a ni a, a tam emaw a tlem emaw anih chuan harsatna nasa tak a thlen thei.
- Tip 5: Chin dan tha lo kalsan
Sawi thui tehchiam a ngai tawh awm love. Nang leh naute tana thil pawi thlen thei leh hlauhawm thei tur reng reng paih bo la, i nun atangin paih chhuak ang che.
Zu leh zial, ruihtheihthil chi hrang hrangte hi a rang a rang sim vat chi a ni a, kawppuite pawh hetiang laka inthiarfihlim tura thinlung leh tih tak zeta ngen fo a tha.
- Tip 6: Hriatzauna
Hmeichhe taksa awmdan te, nau lo insiam dan te, naupai zinkawng zawh dan tur te leh nauneihna te thlenga mithiam te ziah lehkhabu chhiar fo a tha a, Chhula naute seilen dan leh awmdan te pawh hi chian ngei ngei bawk tur a ni.
Hengte hi i hriatchian a, i hre fiah bawk anih si chuan nangmahah inrintawkna a lo awm tulh tulh anga, hlauhna leh zamna bakah, huphurhna te thlengin i hneh chho dawn a ni.
- Tip 7: Hmasawnna
Naupai mek i ni a, i hmasawnna leh kal zel dana kha ngun takin chik thin la, a khâk tawka dinhmun enfiah tura doctor hnena kal te hi tih ngei ngei tur a ni a, test chi hrang hrang pawh paltlang a tha.
Tuna i zinkawng zawhah hian hmasawnna rahbi lo awm zela hi i hriat ve zel a ngai a, a tul bawk.
- Tip 8: Khawiahnge ni ang?
Hunpui lo thleng ta se, khawiahnge ni anga? Khawi hmunah nge i kal ang? Hei hi mi tam takin an hriat hmaih leh a dawna an buai chuk chukna thin a ni a, a sa seh hunah meuh chuan a buai chuar viau reng a ni.
Nang erawh chuan, rilru fim takin nau i neihna hmun tur te zirchiang hmasa la, a hun dik taka thlen tum bawk tur. Thil fel lo leh dik lo a awm lohnan a hun dik takah thutlukna i siam hman ngei ngei tur a ni.
- Tip 9: Doctor leh mithiamte hriatchian
Zawhna i neih a, chian lohna a awm bawk chuan hmeichhe lam thiam doctor emaw mithiam dangte hnena zawhna zawh hreh suh la, an thurawn leh ngaihdan lak i hreh lo bawk tur a ni ang.
Nau i pai phat atang khan i rinngam leh rintlak ngei tur doctor pan la, a enkawlna hnuaiah intulut ang che.
- Tip 10: Invenna neih
A tawp ber, a zawhna ni bawk si lo chu hei hi a ni- I pasal kha a lo in ‘fit’ viau a ni thei a, nang pawh i la chak vak viau a ni thei bawk.
Naupai lai chuan insum a sual lova, a harsa anih erawh natna inkaichhawn theih (infection) lak atanga i him nan condom hman thin tur a ni.