Punjab Democratic Alliance (PDA) nen bial insem dan tura inremna an neih theih loh hnuah Shiromani Akali Dal kehdarha a pakhat zawk, Shiromani Akali Dal (Taksali) leh Aam Aadmi Party (AAP) chuan Lok Sabha inthlanpui lo awm turah Punjab-a thawhho an tum tih an puang a. Thil chiang erawh a la awm chiah lo thung.
Punjab AAP president leh Sangrur MP ni bawk, Bhagwant Mann chuan an party mi pawimawh dangte nen SAD (Taksali) president, Khadoor Sahib bialtu MP ni mek bawk, Ranjit Singh Brahmpura chu Zirtawpni khan a chenna inah an hmu a, an indawr zui a ni.
“Party pahnih hruaitute hi darkar hnih vel an inbia a, AAP nena thawhho hi kan titlu ta a, ni thum hnuah kan inkawm leh ang a, thawhho dan tur chiang zawk chu kan puang ang,” tiin Brahmpura chuan nimin khan a sawi.
A fapa, Khadoor Sahib MLA lo ni tawh thin, Ravinder Singh Brahmpura chuan Taksalis hian bial li — Khadoor Sahib, Ferozepur, Bathinda leh Anandpur Sahib-a chuh an duh tih a sawi.
Mann erawh chuan thawhhona siam hi engmah a sawi duh rih lo va, Harpal Singh Cheema erawh chuan party pahnih hi bial insem dan turah an inrem vek tawh a, thutlukna tawp (final decision) chu puan mai tawh tur niin a sawi thung.