Aizawl : Aizawla Chapchar Kut hmanga rawn kal Taiwan Ambassador Baushan Ger chuan Tuikhuahtlanga Central YMA office chu Zirtawpni tlai khan tlawhin, CYMA hruaitute nen an inkawm.
Central YMA President Lalhmachhuana leh hruaitu dangten Taiwan Ambassador an lo dawng sawngin, inkawmhonaah hian Taiwan thalaite leh Mizo thalaite intlawh tawn (youth exchange) chungchang te, cultural exchange chungchang te, agriculture lam leh skill training lamte leh labour mobility lamte sawiho a ni. Mizo thalaite hmasawnna tur Taiwan sorkarin a tih ve theih turte pawh sawi lan a ni.
CYMA hruaitute chuan YMA kalphung leh hnathawh dante an hrilhfiah a, Mizo thalaiten Taiwan thalaite nena intlawhtawn dan awm thei se an duh thu an sawi. CYMA hmingin ngaihhruina thilpek an hlan bawk.
Taiwan Ambassador hi a nupui Hui-Chen Chen leh Ping-Fan Jian, Assistant Representative ten an tawiawm.